《小傳日記》貿談又觸礁，淡友即叫囂；四連升斷纜，魚缸氣氛淡！

　　《小傳日記》花旗國同神州今日正式向對方嘅進口商品徵收關稅，雖然「孖屐」一早預咗，
但突然有缸友收到風，神州國務院副總理劉鶴請侵侵團隊食檸檬，唔打算遠赴花旗國傾數，搞到
唔少缸友又再一次心灰意冷。加上聯儲局會喺今個禮拜四（２７日）凌晨公布議息結果，如無意
外花旗國會再加一次息，但缸友最驚嘅係議息後會有「鷹派」聲明，美金又因為米字國同歐盟就
脫歐議案嘈交而彈返上嚟，魚缸終結咗連升四日嘅走勢。
　　今朝魚缸低開１６９點，報２７７８３點，而呢個已經係全日嘅最高位，慘！之後一直「瀡
滑梯」，當中，神州錢莊同保險佬沽壓相當強勁，神州磚頭更係領跌一眾藍戰士，魚缸喺晏晝最
多唔見咗５２８點，全日低見２７４２５點，距離２０天線（２７３８７點）只有唔夠４０點。
即使最後只有兩隻藍戰士中海油（００８８３）同長建（０１０３８）錄得升幅，但魚缸最終喺
中秋節仍跌４５４點或近２巴仙，報２７４９９點，守唔住條５０天線（２７８０９點）。
　　因為神州長假期嘅關係，Ａ場同北水都要唞返幾日，冇北水流入嚟，魚缸今日比較乾塘，成
交只有６９３億銀，較上個禮拜五（２１日）大嗱嗱少咗４７巴仙。國貨佬指數就唔見咗１９９
點或近兩巴仙，報１０８２７點。
　　重磅藍戰士今日全軍盡墨，生發發（００３８８）碌低超過２巴仙，報２２４蚊。ＱＱ
（００７００）就同樣唔見咗近２巴仙，報３２７﹒８銀。ＡＩＡ（０１２９９）就最硬淨，跌
咗超過１巴仙，報６６﹒９銀。建行（００９３９）同工行（０１３９８）就一齊唔見咗近２巴
仙，報６﹒７８銀同５﹒６４銀。平保（０２３１８）就最硬淨，跣低半巴仙，報７８﹒４５銀
。
　　
＊隔夜拆息漲地產佬惆悵，Ｐ息就快加港銀隨市插＊

　　本港地產佬嘅噩耗即將到啦！無錯，就係「加息」二字襲港，大家都驚加息會對樓市股市不
利，今日嘅隔夜利率更迫近４厘，而一個月拆息都升穿兩厘。另一邊廂，依然有唔少阿爸阿媽幫
自己仔女排隊買樓，幾球幾球咁入都面不改容，個市係咪真咁怕加息？真心答你唔到，但今日班
地產佬就「未加息，先跌定」。新地（０００１６）跌近１巴仙，報１１６銀。新世界
（０００１７）瀉逾２巴仙，報１０﹒７４銀。信置（０００８３）瀉逾１巴仙，報
１３﹒６２銀。長實（０１１１３）跪低近２巴仙，報５９﹒６銀。
　　按照小傳嘅邏輯，加息梗係對班錢莊佬「爽歪歪」，呢一次加息，都憧憬住錢莊Ｐ按都將會
向上調整，本地薑錢莊應該直線向上！但今日大市氣氛麻麻，所以銀行佬都掉轉向下。大象
（００００５）跌逾１巴仙，報６８﹒９５銀。小象（０００１１）今日跪低近２巴仙，報
２０６﹒６銀。東亞（０００２３）急挫近３巴仙，報２９銀。渣打（０２８８８）今日跌逾
１巴仙，報６５﹒２５銀。中銀（０２３８８）跌逾２巴仙，報３６﹒４銀。

＊大摩唔睇好舜宇續哀號，２８５發威聯通急跪低＊　
　　
　　一眾手機佬又齊齊跌喇！今次跌得最甘係邊個啊？咪係神州鏡頭一哥舜宇（０２３８２）囉
，事源大摩最新報告話，行內競爭激烈，加上舜宇混合產品改善有限，憂慮佢手機相機模組毛利
率，所以降佢「他屐」到９５蚊，仲畀咗「與孖屐同步」評級佢，舜宇今日股價當然唔好睇喇，
失守１０天線（約９１﹒９７銀），報８９﹒０５銀，跌４巴仙，而另一個兄弟瑞聲
（０２０１８）就喺芬蘭坦佩雷投資２０００萬美元，希望擴展光學研發，不過消息就好似對股
價無咩反應喎，今日都係喺「８０蚊」關口來來回回，收報７９﹒３５銀，跌１巴仙。
　　最威水都係比亞迪電子（００２８５），花旗話隨住公司嘅金屬機殼業務利潤率回穩，而
３Ｄ玻璃機殼同Ａｐｐｌｅ外圍產品，以及汽車信息娛樂系統等商機亦浮現，所以調升公司「他
屐」由１４蚊升至１５蚊，投資評級由「掟貨」升至「掃貨」，今日收報１２﹒２銀，升３巴仙
。
　　神州電訊股隨市走低，聯通（００７６２）急挫４巴仙，報９﹒１５銀，失守咗１０天線（
９﹒３２６銀）、２０天　（９﹒３銀）、５０天線（９﹒３８４銀），慘！中電信
（００７２８）唔見咗兩巴仙，報３﹒７１銀。中鐵塔（００７８８）股價靠穩到無升無跌添啊
！今日收報１﹒１８銀。中移動（００９４１）就報７５﹒５銀，軟１巴仙。

＊美高梅遭殃銀娛亦重傷，好友急著草車佬全回吐＊

　　高佬發表報告，估計馬交博彩佬純利會跌，但幅度會比以往少，仲上調金沙（０１９２８）
評級由「中性」至「買入」；花旗就話，市場忽視咗博彩佬基本因素穩健，預料行業投資氣氛會
好轉，但調整博彩業收入預測由升１６個巴仙，降至按年升１４個巴仙。
　　不論報告如何，博彩佬都要跟住個市碌低，金沙回吐２個巴仙，報３６﹒１５銀；銀河
（０００２７）挫４個巴仙，報５２﹒７銀；美高梅（０２２８２）同澳博（００８８０）同樣
慘淡，齊齊跪低５個巴仙，報１３﹒０８銀同７﹒３２銀；永利（０１１２８）唔見４個巴仙，
報１９﹒３６銀。
　　砵砵車上個禮拜狂飆，主因係國務院發文要促進消費，長汽（０２３３３）上一個禮拜累計
漲左近２３個巴仙，係表現最佳國指成分股，不過今日顯著回吐５個巴仙，報５﹒２５銀，倒返
轉成為全日最差國貨佬！另一方面，吉利（００１７５）行政總裁桂生悅話，貿易戰會影響車市
銷售氣氛，但對於神州放寬關稅同外資股權限制，仍然「舉雙手歡迎」，有信心產品競爭力唔輸
比過江龍咁話喎，但股價今日就輸咗，隨市回吐近４個巴仙，報１５﹒９２銀，真係彈得甘，回
得亦甘。

＊恆大闖新疆廣匯股價揚，建築佬逆升基錦飆五成＊

　　四條三恆大（０３３３３）向廣匯寶信（０１２９３）阿媽新疆廣匯揼水１４５億人仔，而
雙方將會喺砵砵車銷售、磚頭、能源同物流等領域開展合作，所有交易完成之後，恆大就合共持
有新疆廣匯近４１巴仙股權，成為第二大股東。
　　阿媽可以引入磚頭一哥做股東，阿仔廣匯寶信自然開心都嚟唔切，股價上禮拜五（２１日）
飆近１８巴仙後，今日再爆上，逆市彈起超過１６巴仙，報２﹒７８銀。四條三就冇咁好彩，隨
神州磚頭插４個巴仙，報２５﹒８銀。
　　貿易戰殺到埋身，細價魚毛值搏率更大，今日本地建築佬逆市爆上，兩間從事香江地基工程
嘅公司齊齊破頂，午後更係愈升愈有，基地錦標（０８４６０）飆近五成，報１﹒４３銀；泓盈
（０１７３５）飆兩成五，報２﹒２銀。中秋假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。