《小傳日記》擔憂意大利公投，魚缸通車前好愁！

　　《小傳日記》噚晚（１日）歐美主要指數除道指可以獨善外，其餘全部趴低。再望埋意粉國
嚟緊星期日（４日）就修憲進行公投，缸友經歷咗米字國脫歐同埋花旗國總統大選出現兩隻「黑
天鵝」後，都咪話唔擔心意粉國公投再生變數。
　　香缸之前升咗兩日，合計落袋１４１點，不過今朝一開賽已經趴低１４１點，即係全部報銷
，之後仲愈跌愈深，最多試過唔見３１９點，埋單計算唔見３１３點巴仙，收報２２５６４點，
失守十天線（約２２６８４點）及廿天線（約２２５８９點）。全星期計，魚缸失咗１５９點。
國貨佬今日亦趴低１１１點，收報９７８１點。主板成交８０９億銀，較噚日多返８巴仙。
　　講咗好耐嘅「深港通」終於喺下星期一（５日）通車，加埋周日嘅意大利公投，下星期一魚
缸隨時又坐過山車，缸友真係記得扣好安全帶啦！

＊限茄殊入境賭仔變憔悴，油價再急升油股無人追＊

　　馬交打算規定旅客帶超過１２萬入境要申報，馬交就話係為咗滿足反洗黑錢同反恐嘅國際規
定。德銀話可能會影響近期賭仔ＶＩＰ業務復甦，野村就話人仔貶值可能令博彩量增加，預期
１２月賭收按年升１１至１３巴仙。賭仔最近升咁多呈超買，今日借消息大插水，兩位藍戰士銀
娛（０００２７）同金沙（０１９２８）跣低近半成同近４巴仙，報３５﹒７５銀同３６﹒５銀
，藍戰士中包尾。
　　油價再急升４巴仙但油佬都仲係要隨市腳軟，中石油（００８５７）同中海油
（００８８３）齊齊軟太約半個巴仙，埋單５﹒４９銀同１０﹒３４銀。

＊大行各唱各車仔入後波，聯通回回氣混改搞邊科＊

　　砵砵車今日冇運行，吉利（００１７５）畀大摩唱衰，評級降至「減持」，「他屐」亦削到
６銀，應聲趴低逾４巴仙，報７﹒６５銀。華晨（０１１１４）即使獲麥格理升目標，預期新型
號可以為未來幾年帶嚟穩健盈利增長，依然要碌低近２巴仙，得返１０﹒６６銀。街坊北汽
（０１９５８）成為奇葩，話阿爺早排決定向超豪華小型汽車加消費稅，對佢唔會有咩影響，逆
流跑前近１巴仙，報７﹒２７銀。
　　聯通（００７６２）阿媽再三強調，列入混改第一批試點其實未攞到最終批准，點樣實行嘅
方案都仲係討論緊。聯通之前兩日足足斬穫１２巴仙，今日終於冷靜落嚟，嘔返逾３巴仙，埋單
９﹒５銀。

＊股王被踐踏保保齊踐低，阿爺來錫錫神仍然翳＊

　　股王ＱＱ（００７００）噚晚喺花旗ＡＤＲ報價軟逾１巴仙，香江呢邊都要跪低近２巴仙，
報１９１銀，盤中其實曾經失守１９０蚊，低見１８９﹒６銀！另一方面友邦（０１２９９）都
穿咗２５０天線，盤中低見４５﹒３０銀，創逾４個月低位。
　　今日神州魚缸漲唔起，保險佬國壽（０２６２８）、平保（０２３１８）今日都無運行，腳
軟近３巴仙同近２巴仙。
　　阿爺表示，四季度煤炭需求缺口處於平衡狀態，另外又有消息話，阿爺唔再接受新煤礦開採
同加工項目，預計將會持續到２０１８年年尾；可惜消息並無令到煤佬興奮起上嚟，神華
（０１０８８）只係靠穩無變動。另外３隻一樣無變動嘅藍戰士，旺旺（００１５１）、昆能
（００１３５）、大象（００００５）已經成為全日表現最好嘅藍戰士！兗州煤業
（０１１７１）亦有近１巴仙進帳，報５﹒４銀。

＊炒股唔炒市膳源最誇張，建屋御藥堂今天齊齊漲＊
　　
　　半新股膳源（０１６３２）落場四日，後勁仍然凌厲，今日再斬穫近四成，收報７﹒０２銀
，較招股價２銀高咗足足２﹒５巴倍，如果上市只揸一手，揸到而家都有成萬銀落袋，為今日最
叻仔個股。香港建屋貸款（００１４５）跟隨其後，收穫逾２１巴仙，收報０﹒４３銀。
　　御藥堂（００９３２）上月已經累計升逾７６巴仙，近中午時間開始踩油向前衝，駛前近
１５巴仙，收報３﹒４２銀，創埋上市新高。
　　恆騰（００１３６）噚日抽高後升幅顯著收窄，今朝更錄得１億銀嘅大手交易，回吐成近３
巴仙，收報０﹒６９銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。