《小傳日記》生發發夠晒精靈，魚缸宣告九連勝！

　　《小傳日記》花旗國噚晚（１９日）表現唔錯，道指升６６點，標指、納指更加齊齊破頂。
香江魚缸今朝都跟住開Ｐａｒｔｙ高開９８點，雖然ＱＱ（００７００）試闖３００蚊大關之後
一度腳軟軟，拖累魚缸跌過３９點，但大市好快都重拾強勢；喺生發發（００３８８）發力帶領
之下，下晝最多衝前１２２點高見２６７９４，再創逾兩年高，全日埋單計數就收穫６８點或
０﹒３巴仙，報２６７４０。魚缸經已連續打贏９場勝仗，累漲１３９９點，氣勢如虹！
　　國貸佬今日就麻麻地，跣低１３點報１０８４６；而Ａ場滬指就斬穫１３點收３２４４。缸
友憧憬「大時代」再度歸來，交投活躍非常，總成交約９０５億銀。
　
＊高佬升他屐粉絲來錫錫，生發發破頂邊個夠我叻＊
　
　　大隻佬藍戰士生發發有高盛睇起，升「他屐」到２４５銀叫「買貨」，話現金同衍生工具日
均成交有增長會幫助提高盈利，佢應聲飛起４巴仙，上到２２１﹒４銀約兩年高位插旗！生發發
今個星期仲會北上路演，招攬啲高科技公司嚟香江上市，似乎「錢」途無窮！
　　招商局港口（００１４４）都唔輸蝕，駛前近４巴仙，報２４﹒４５銀。大和力撐升級至
「跑贏孖屐」，目標亦上調至２７銀，大讚上半年吞吐量增長比預期好。
　　野村預期ＡＩＡ（０１２９９）第二季新業務價值增長會減慢，但仍然升目標至６０﹒９２
銀。ＡＩＡ曾經破頂高見５９﹒５銀，收尾就行前近２巴仙，收報５９﹒３銀。　　
　
＊友邦與招商拍住齊齊上，ＱＱ三紅底掉頭有點悵＊
　
　　ＱＱ之前獲野村睇好，畀目標３４１銀，又有神州媒體話佢可能會參股央企，朝早曾經彈上
３００銀創新高，最終回軟唔夠半個巴仙，報２９７銀。
　　美圖（０１３５７）早輪話，會同Ｆａｃｅｂｏｏｋ合作推出３款ＡＲ相機特效，泊到個好
碼頭刺激佢今日衝高７巴仙，報１１﹒６２銀。
　　舜宇（０２３８２）之前發盈喜帶動股價兩日累升兩成半，不過試闖１００銀大關未成功，
今日更回吐逾２巴仙，報９６﹒６銀。朋友瑞聲（０２０１８）就表現好好多，獲高盛調升目標
至８６銀，一度跑到上１２７﹒９銀歷史新高，埋單升近６巴仙，報１２３﹒６銀。
　
＊泊到好碼頭美圖果秀秀，舜宇回回氣瑞聲凱歌奏＊
　
　　備受注目嘅融創（０１９１８）同萬達「民企大刁」終於有細節，最終預埋富力地產
（０２７７７）份。融創豪花４３８﹒４億人仔收購萬達１３個文旅項目９１巴仙股權，而富力
就以１９９億人仔接手萬達商業７７家城市酒店。大摩認為新方案會更加有利融創，融創即刻飆
前逾１４巴仙，報１９﹒６４銀。富力跟住踢高近７巴仙，報１３﹒８銀。之前話單「刁」對自
己冇咩影響嘅萬達酒店發展（００１６９）一樣受捧，跳高逾６巴仙，收０﹒８２銀。
　　街坊恆大（０３３３３）同碧桂園（０２００７）都叨光，齊齊企高逾８同６巴仙，分別報
１７﹒３同９﹒８１銀。
　
＊大刁有細節融創即報捷，街坊有榮焉炒高不怕跌＊
　
　　中國重汽（０３８０８）估計中期純利大升超過４倍，更加有摩通唱好，提升他屐到９銀，
全日暴漲近２７巴仙，報７﹒９６銀。
　　中興通訊（００７６３）放榜，中期多賺近三成，富瑞相信佢喺神州嘅市佔率會增加。中興
爆高近１０巴仙開晒香檳，報２０﹒７５銀。
　　下星期二出成績嘅ＡＳＭ（００５２２）有瑞信支持，調高目標價至１５７銀，佢一度升至
１２５﹒８銀刷新上市新高，結尾斬穫近２巴仙，報１２２﹒８銀。
　　中海油服（０２８８３）預料中期虧損大減到３﹒７億人仔，表現有啲改善，缸友都畀個
ｌｉｋｅ，捧高逾４巴仙，報６﹒７２銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。