《小傳日記》魚缸微微升，藍戰唔算醒；香江預加息，渣打彈得勁！

　　《小傳日記》花旗國隻「牛」真係愈衝愈起勁，因為美債收益率上升嘅關係，花旗國間間錢
莊都有追捧，順便推高埋當地個魚缸又再接近新高，高盛同摩通都分別升接近３巴仙，唯獨個納
指小小唔爭氣向下，聽聞隔離歐盟話要制裁ｆｂ，嚇到其他科技股都跌一跌先，所以納指最終收
報７９５０點，跌６點。道指收２６４０５點，升１５８點或逾半個巴仙。標普收報２９０７點
，升３點。
　　本以為今日（２０日）香江個魚缸都跟一跟花旗國，早上高開近２００點，最多升過２２０
點，但之後升幅全部蒸發，可能受到神州個市拖累關係，部分資金都開始流入避險股，魚缸更曾
倒跌８０點，好彩最後仍收升７０點或０﹒３個巴仙，收２７４７７點，成交額８６８﹒３７億
銀跌約一成。
　　國貨就收報１０７９２點，升５０點或迎半個巴仙。Ａ股滬市收報２７２９點，跌１點。　
　　藍戰士就好似無乜精神咁，ＱＱ（００７００）升近１巴仙，報３２４﹒２銀；ＡＩＡ
（０１２９９）跌近半個巴仙，報６５﹒５銀；港交所（００３８８）微升６亳子收報２２５銀
；中生製藥（０１１７７）略見回吐，收跌近２巴仙報７﹒３９銀；電能實業（００００６）收
跌逾１巴仙，報５５﹒３銀。

＊匯豐加存息渣打爭住升，存款可買股內銀又食胡＊

　　今個月最大嘅新聞，可能係下個星期聯儲局議息，雖然大家都話呢次加就加硬，但大家加都
留意緊議息聲明會唔會對之後嘅貨幣政策有啲啟示。之不過，香江銀行呢一邊重十五十六話加唔
加好之際，匯豐銀行就一馬當先跑出，今日起３個月到１年存款嘅息口都加返一厘，孖屐預會好
快加最優惠利率（Ｐ），銀行息差可以擴大。不過，今日最好笑就係大升嘅竟然唔係大象
（００００５）而係渣打（０２８８８），渣打全日彈近５巴仙，報６５﹒３５銀；大象只係升
１個巴仙多少少，報６８﹒６５銀。東亞（０００２３）亦彈逾２巴仙，報２９﹒６銀。恆生
（０００１１）亦進帳近２巴仙，報２０７﹒２銀。中銀香江（０２３８８）只升一格報
３５﹒９銀。
　　另一方面，今日內地錢莊股都輕輕上揚，有消息指，阿爺計劃緊神州錢莊可唔可以用戶口可
以直接買賣股票，即係錢莊可以撈埋券行個份！建行（００９３９）同工行（０１３９８）升約
半個巴仙，分別報６﹒６９銀及５﹒５６銀。農行（０１２８８）倒跌逾半個巴仙，報３﹒７銀
。交行（０３３２８）彈逾１巴仙，報５﹒７５銀。中行（０３９８８）升一格報３﹒４３銀。

＊瑞聲本係威可惜力不繼，聯通用戶漲股價亦上揚＊　
　　
　　噚日一眾手機佬齊齊上揚之後，今日大部分都要跪低，好似今朝原本係威係勢嘅瑞聲
（０２０１８）最高見８５﹒４銀，曾經收復十天同廿天線，仲做過最佳藍戰士，不過最後都係
要喺高位回落，加上畀麥格理維持「跑輸大市」評級，「他屐」７０銀，最終收報８０﹒１５銀
，只升１巴仙咋，不過好彩嘅係十天線仲係到囉；通達（００６９８）喺今個月１４號同１７號
獲主席王亞南增持後，股價連日連升後，今日都要回調，跌近６巴仙，報１﹒１３銀；高偉電子
（０１４１５）就牛皮，收報１﹒１９銀；舜宇光學（０２３８２）升唔夠１巴仙，報
９５﹒５５銀；鴻騰精密（０６０８８）收報３﹒７９銀，跌唔過１巴仙；最威水都係比亞迪電
子（００２８５），有傳因為３Ｄ玻璃蓋板應用潮流嘅興起，可以為佢未來幾年業績帶來增長，
所以繼噚日升咗９巴仙之後，今日再踢高近９巴仙，報１１﹒７２銀。
　　雖然聯通（００７６２）同中電信（００７２８）嘅合併傳聞告一段落，不過又唔使愁嘅，
因為聯通昨日公布今年８月份嘅營運數據，其中移動業務用戶達３﹒０７２億戶，移動業務用戶
淨增長２６８﹒６萬戶；４Ｇ用戶累積達２﹒１０８億戶，４Ｇ用戶淨增長達４０７﹒５萬戶，
刺激今日聯通股價上升，收報９﹒５５銀，升超過１巴仙；而中電信就收報３﹒８２銀，升近
２個巴仙。鐵塔（００７８８）自從破１銀關口之後，股價遂步靠穩，靠穩到無升無跌添啊！今
日收報１﹒１８銀。中移動（００９４１）上月４Ｇ客總數按月淨增６４２﹒８萬戶，較上月增
長稍為放緩，但股價仍收升逾１巴仙報７６﹒９銀。

＊原油庫存跌油佬反腳跣，貿戰氣氛降金佬唔沮喪＊

　　花旗國上個禮拜嘅原油庫存又跌過，計一計已經跌足五個禮拜，加上花旗國１１月就要制裁
伊朗嘅石油出口，原油供應自然緊張，紐約期油噚晚漲近２個巴仙。油價表現省鏡，但石油佬今
日飆高後偏軟，中石化（００３８６）唔見１個巴仙，報７﹒７７銀；中石油（００８５７）無
乜升跌，報６﹒１６銀；中海油（００８８３）就瀉近２個巴仙，報１４﹒６８銀。其他相關股
方面，中海油服（０２８８３）今早高開後慢慢回落，收軟１個巴仙，報８﹒０３銀；昆侖能源
（００１３５）升半個巴仙，收８﹒８６銀。
　　貿易戰緊張氣氛叫做暫時減退，但係花旗國缸友都開始擔心，令到美金唔再係避險天堂，反
而轉去買黃金，金價噚晚向上，紐約期金收高５﹒４美金，報１２０８﹒３美金。黃金佬最開心
，紫金礦業（０２８９９）漲近５個巴仙，報２﹒８７銀；招金礦業（０１８１８）彈起１個巴
仙，報６﹒０４銀。

＊純利大升起新世界牛皮，美團首掛醒玖紙要調整＊

　　地產佬方面，新世界（０００１７）今日派中期業績，純利多賺兩倍，年度基本溢利亦高過
孖屐預期，全日靠穩報１０﹒３６銀；太古Ａ（０００１９）今日表現幾好，一度係升幅最勁嘅
藍戰士，全日就收漲１個巴仙，報８７﹒４５銀；九倉置業（０１９９７）表現就係藍戰士最差
，全日瀉近２個巴仙，報５３﹒０５銀。
　　香港電訊（０６８２３）今日曾高見１０﹒９銀，創超過兩年新高，加上瑞銀唱好，上調佢
今年到２０２０年嘅盈測１至５個巴仙，目標價就由睇１２﹒３銀變到睇１３﹒１銀，最終收漲
近１個巴仙，報１０﹒７８銀。
　　玖紙（０２６８９）噚日彈起５個巴仙後，今日「全數回贈」，沉足６個巴仙，報８﹒９４
銀，里昂報告話，紙張需求減弱但新產能增加，加上人民幣貶值等因素，維持審慎睇法喎。
　　美團點評（０３６９０）係第二隻「同股不同權」形式上市嘅魚毛，今日首掛收７２﹒６５
銀，高招股價逾６個巴仙，每手唔計手續費賺３６５銀，而佢全日成交額都領先ＱＱ，達到８４
億有多。市況咁差，有咁多買盤，首掛有得升算唔錯啦！請請！

　　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。