《小傳日記》佔中失控，牛熊失守！

　　《小傳日記》９月２８日，一定係香港人心痛的一天，相信好多市民都同小傳一樣，徹夜難
眠，昅實ＴＶ新聞直播……
　　「佔中」提早展開，示威者集結喺中環、金鐘、銅鑼灣及旺角。香江魚缸今日（２９日）都
能夠如常開市；不過面臨政局動盪嘅時刻，縱然道指上星期五（２６日）反彈逾百點，Ａ仔場今
日都企得穩，都難阻香江魚缸裂口低開２７８點嘅命運，之後當牛熊線（約２３１７３點）都宣
告失守後，跌勢更一發不可收拾，大市一度蒸發咗５８２點至２３０９５。收市前收復番少少失
地，但仍重挫４４９點收２３２２９，國貨指數就碌低１４５點收１０４３９。
　　全日成交明顯多番好多，有成逾８８９億銀，比上星期五增加咗超過３３巴仙！

＊曾挫近六百成交急急增，你掟我又掟空倉有得分＊
　　
　　「佔中」加期指結算日，淡友當然唔會錯過進攻機會。唔駛問阿貴，首當其衝必定係生發發
（００３８８）。雖然行政總裁李小加今朝力證整體運作正常，仲已經準備好應急措施。不過香
江發生咁大件事，佢都話孖屐短期會幾波動，將來要繼續密切留意事情發展！
　　但望住電視上面愈來愈多示威者上街，李小加今次派幾大粒定心丸都無用，今朝一開市就碌
咗落嚟，１７０蚊眨吓眼就無咗，最終收報１６９﹒７銀唔見逾３巴仙，成交高達３６億銀，僅
次於榜首ＱＱ（００７００）之後。
　　仲有之前炒「滬港通」嘅券商股都一齊中招，第一上海（００２２７）嘔番８巴仙出嚟收
１﹒４８銀，時富投資（０１０４９）攬住囝囝時富金融（００５１０）一齊捱沽，分別唔見逾
１３巴仙及近９巴仙。

＊滬港通股份今天不輕鬆，港所與券商粉絲失了蹤＊

　　家陣香江政局正值危急之秋，社會「立立亂」之下，金融世界亦都唔好過，呢樣亦都係港府
最驚發生嘅一件事。其實「佔中」未開波之前，港匯已經跌足成個星期，而喺提早啟動之後，港
匯今朝即刻跌到去半年新低，就連７﹒７６大關亦不保，缸友都不知幾驚資金會開始流走。
　　除咗魚缸面臨走資危機之外，一眾中港錢莊都不知幾頭痕，大象（００００５）、渣打
（０２８８８）、恆生（０００１１）、中銀香港（０２３８８）等都有部分分行要暫停服務，
搞到全部股價都要齊齊唔見１至３巴仙。而細間啲嘅本地錢莊就跌得比較多，東亞
（０００２３）、大新銀行（０２３５６）、大新金融（００４４０）跌幅就介乎３至逾４巴仙
。

＊港匯腳仔軟創半年新低，分行要唞唞錢莊紛跌低＊

　　佔中提早發生，作為香港經濟命脈之一嘅地主股都好難獨善其身，隨時連好ｈｉｔ嘅新盤銷
情都會受冷鋒吹襲。當中新世界（０００１７）跌得最甘，唔見成４﹒６巴仙，為表現最差藍戰
士。信置（０００８３）亦都緊隨其後，跌４﹒５個巴仙。長實（００００１）都跌穿１３０蚊
心理關口，收報１２９﹒７銀唔見咗近４巴仙。新地（０００１６）沽壓仲勁，以約１２億銀成
交插低３﹒７巴仙收１１２﹒１銀。
　　地主股受影響，出租股都唔好得去邊。大隻佬九倉（００００４）跌近４個巴仙，收報
５５﹒２銀，百天線同牛熊線同告失守。街坊太古地產（０１９７２）、希慎（０００１４）都
分別碌低３及４巴仙，恆隆地產（００１０１）都陪跌，唔見３﹒６％，收報２２﹒５５銀，無
一倖免。

＊地主收租佬兩者皆苦惱，零售扮靚股忍手勿亂撈＊
　　
　　不過講到影響得最勁嘅板塊，本地零售股就一定欲哭無淚。仲有兩日就到十一黃金周，但受
到提前佔中嘅打擊，珠寶店一哥周大福（０１９２９）旗下三分一嘅店舖都做唔到生意，被迫拉
閘停業，仲講到明對銷售有一定影響。結果股價即應聲急插近４巴仙收報９﹒９３銀，同業六福
（００５９０）跌得仲多，埋單蒸發近５巴收２１﹒７銀。
　　仲有專做自遊行生意嘅莎莎（００１７８）同卓悅（００６５３）就梗係難逃一跌，分別唔
見逾３巴仙及近４巴仙。而Ｉ﹒Ｔ（００９９９）、堡獅龍（００５９２）傷亡更慘重，埋單各
碌低近６巴仙及８巴仙。最後，願一切動盪能盡快在和平中平息，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。