《小傳日記》眨眼就到兩萬四，內房急升好犀利！

　　《小傳日記》自從阿爺噚日（２２日）再暫停開抽水機之後，Ａ仔場繼續向上衝，今日
（２３日）仲一度升到去２０８８點，去番上月中高位，不過之後收晒火，全日只係升３點收報
２０７８點。但國貨指數就一樣咁叻仔，急升２１５點或２巴仙，收１０８２０點，逼近今年新
高！
　　香江缸友見Ａ仔場勢頭唔錯，就齊齊衝晒去兩大Ａ股ＥＴＦ度，雖然Ａ５０中國
（０２８２３）同南方Ａ５０（０２８２２）只係輕輕踢高０﹒６巴仙，但係成交就明顯急增，
均錄得逾１８億銀，位列最大成交股份第２名及６名。　
　　除此之外，一班中資股都成為升市大功臣，曾經合力推高大隻佬指數去到２３９７５點，急
漲１９３點，差少少就上番二萬四大關，完場就有１８９點進帳收２３９７１，成交仲多過噚日
逾１１巴仙，高達７９８億銀左右，係自今年４月１１號以來最多嘅一日！
　　
＊升市交投增好友確開心，中字派發力淡友有點震＊

　　大隻佬指數差ＤＤ就「親吻」兩萬四，梗係要讚吓一眾「中」字輩功臣啦，基本上是旦揀幾
隻「中」字嘅大隻佬，今日都有唔錯表現！好似巨無霸中石油（００８５７）就貢獻咗２１點，
係最落力股份。原來穆迪大讚中石油同中石化（００３８６）信用品質優良，就算面對產能過剩
都唔驚！畀人讚一讚，表現都寧舍唔同，完場時升幅介乎２至３巴仙。
　　祖國錢莊都發力追落後，民行（０１９８８）跑贏成班大佬，抽高２巴仙收７﹒３２銀，信
行（００９９８）都唔執輸，升逾１巴仙曾見超過一年新高。三大國有錢莊建行（００９３９）
、工行（０１３９８）、中行（０３９８８）都有約１至２巴仙進帳，再加埋國壽
（０２６２８）同平保（０２３１８）力量，五大功臣合力推高大隻佬共７７點，佔咗全日升幅
近四成啦！
　　
＊內銀與保保同樣好賣力，內房吼龍頭萬科創新高＊

　　祖國地主亦延續強勢。噚日市場傳出溫州全面解除限購令，已經見到地主股蠢蠢欲動，今日
又有報道話海口多家售樓處已接到海口市房管局電話通知，取消商品房限購。計埋海口市，限購
鬆綁嘅城市有成３０個咁多。利好消息一個接一個，一眾地主當然唔會令缸友失望啦！兩間龍頭
地主華潤置地（０１１０９）同祖國海外（００６８８）分別踼高７﹒５﹒巴仙同４﹒２巴仙，
收市報１６﹒８６銀同２２﹒３５銀，認真誇張，當然做咗最佳大隻佬第一同第二名啦。
　　同樣屬於龍頭級嘅萬科企業（０２２０２）都唔失禮，全日升近６巴仙，收１７﹒１２銀，
仲成功創出上市新高１７﹒２２銀。部分二線內房世房（００８１３）同碧桂園（０２００７）
全日踢高近６巴仙同逾４巴仙，表現都唔錯。

＊江西銅異樣靚爆成交旺，巨星購華融信達有光環＊

　　成班中資股咁省鏡，國貨指數仲跑贏大隻佬，就梗係要睇吓邊位國貨佬咁叻啦！今日Ａ仔場
興炒有色金屬板塊，帶挈江西銅（００３５８）今日逾４億銀成交踢高逾５巴仙，收１４﹒７４
銀，做咗最靚仔國貨佬！
　　另邊廂，中國信達（０１３５９）全日都好標青，朝早開市仲無端端炒高逾一成；雖說收市
就縮晒水，只係踢高近５巴仙報４﹒３１銀，不過都成為第二佳表現股份。其實噚日（２２日）
傳出高盛、復星集團、中金公司等多家投資機構揼水２０億美金，收購祖國最大壞帳管理公司中
國華融資產管理最多２０％股權，華融董事長仲話引入戰略投資者後，將加快下半年上市計劃。
信達又係做管理壞賬生意，唔怪得已經快人一步，好價達到，「影子股」效應乎？

＊三股逆市跌你碌我又碌，麥記來唱淡旺旺淚汪汪＊

　　今日咁多中資股真係搶晒風頭，搞到好多重磅股都無晒癮，大象（００００５）全日無升跌
，企番喺８０﹒１銀，ＱＱ（００７００）只係升０﹒２巴仙收１２４﹒３銀。下星期四（３１
日）放榜嘅和黃（０００１３）仲「陰功豬」，由頭跌到落尾，逆市唔見逾１巴仙收１０２﹒４
銀；夥拍旺旺（００１５１）同聯想（００９９２）一齊做咗最差藍籌三寶；而旺旺仲畀麥格里
唱淡今年盈利唔係咁好，削目標價至１０﹒５銀，搞到收市要大跌近４巴仙收１０﹒６２銀。
　　不過，呢幾日個市升得咁勁，港交所（００３８８）都為香江大隻佬爭番啖氣，近１７億銀
大成交再升逾１巴仙，收１５９﹒１銀，仲一度升至近三年高位。
　　是日大暑，唔怪得個魚缸咁熱啦！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。