《小傳日記》中港魚缸齊破關，內險爆升確燦爛！

　　《小傳日記》噚晚（２５日）花旗國意外上調番第三季經濟增長至３﹒９巴仙，不過其他數
據唔靚仔，加上美股都升到去１７８００左右高位，唔能夠乘勢破關都屬預期之內。另一邊廂，
Ａ仔場開行Ｔｕｒｂｏ，衝高逾１巴仙，成功升越２６００大關收２６０４點，帶挈香江打破悶
局；成班好友食住Ａ股強勢，今日（２６日）下半場大發神威，一度推高香江魚缸升近３３３點
。喺聽日（２７日）期指結算日前收復番二萬四，恆指今日埋單都仲有２６８點收穫，報
２４１１１點，連１００天線（約２４０１２）都攻陷埋，強！
　　咁啱得咁橋，國貨佬指數竟然同大隻佬一樣，都急漲２６８點收１１０５１；當然以幅度計
，就梗係跑贏大隻佬啦！今日無摩指執位，無新丁登場之下，全日成交都有８７６億銀左右。勁
呀！

＊Ａ仔急急漲香江即上揚，個倉無國貨難免心惆悵＊

　　Ａ仔場咁旺，一班ＥＴＦ股當然乘勢向上衝，安碩Ａ５０（０２８２３）、南方Ａ５０
（０２８２２）成交急增，有近４１億銀及３０億銀，兩位孖寶仲一齊上番十蚊關樓上，齊齊袋
咗約３巴仙落袋。瑞銀仲話，阿爺減息兼「滬港通」帶動之下，Ａ仔場喺出年農曆新年前，有機
會升到去２９００點添，睇嚟ＥＴＦ股仲有運行喎。
　　同Ａ仔表現息息相關嘅「燕疏」一族，就好似中咗六合彩，唔單止炒Ａ股破關嘅強勢，阿爺
又送上大禮，話說上海出台保險「國十條」，目標２０２０年將上海發展成為國際保險中心，龍
頭國壽（０２６２８）就立即升咗上太空，爆升逾７巴仙報２６﹒８銀，新華保險
（０１３３６）仲勁，噚日先畀股東掟貨，今日就衝番上近９巴仙收３５﹒１銀，差ＤＤ仲破埋
頂添！

＊兩隻Ａ５０你漲我又漲，滬推國十條保險齊齊上＊

　　唔單止燕疏股有好表現，祖國錢莊下半場都跟住個市飆咗上嚟；當中，民行（０１９８８）
就最巴閉，跑贏其他街坊，大升５巴仙收８﹒１９銀，仲一度創埋劇年半新高。其他街坊重農行
（０３６１８）都好威水，袋咗４﹒７巴仙收４﹒２７銀。大大隻嘅國有錢莊就無咁靈活，升得
無咁多，但都工行（０１３９８）、中行（０３９８８），建行（００９３９）都有１巴仙至逾
２巴仙進帳，都算唔錯了。
　　仲有券商股都升得好勁，雖然通車效應散得好快；但有數據顯示，１１月祖國券商佣金收入
高達逾９８億人仔，係今年以來單月最高。再加埋大和唱好中國銀河（０６８８１）同中信証券
（０６０３０）今日都光榮破頂，收市各升５巴仙及逾２巴仙，而其他券商股都有２至６巴仙升
幅。

＊內銀威番轉民行最靚仔，券商股亦勁破頂不閉翳＊
　　
　　除咗班「中」字輩股份開Ｐａｒｔｙ之外，香江呢邊嘅領匯（００８２３）都無失威，自從
噚日里昂出報告唱好，係咁易升咗目標價至５３﹒７銀，重申「優於大市」評級之後，今日就成
功寫下光輝一頁，寫下４９﹒２５銀嘅上市新高，完場前都保持到升勢，抽高逾２巴仙收
４８﹒９５銀。
　　重磅股大象（００００５）雖然又有醜聞纏身，被指操控金屬價格，不過可能缸友都聽到無
晒感覺，照樣入市掃貨，埋單升逾１巴仙收７７﹒９５銀，十天及廿天線都衝破埋，形勢都唔錯
。另一大隻佬友邦（０１２９９）都出咗唔少力，升咗逾１巴仙收４５﹒１銀。最失威係祖國移
動（００９４１），堂堂大阿哥但完全無貢獻，微跌０﹒１巴仙收９５﹒８銀，瘀。　　　　

＊領匯又破關港視見異動，中移大大隻今天乏力衝＊

　　上個星期三，即係１９號，係香港電視（０１１３７）開台嘅大日子，眨吓眼就過過一個星
期，小傳身邊嘅朋友對港視所拍嘅劇集，基本上都係有讚無彈，只係有時會遇上網絡大擠塞咁話
。主席王維基就急不及待，話最遲聽日（２７日）就會公布首星期嘅營運數據，今日股價就率先
炒咗上去，飛升逾１２巴仙收４﹒４１銀慶祝。另一方面，孖屐又爆出，原來通訊局曾經建議唔
好續牌畀亞視，王維基就話唔想作出評論，但就呼籲政府依法處理免費電視申請囉…唔知故事會
唔會有突破性發展呢？！請請！
　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。