《小傳日記》震後要唞唞，六月再激鬥！

　　《小傳日記》中港魚缸噚日（２８日）發生「大地震」，震走咗唔少缸友，雖然今日（２９
日）無發生強力「餘震」，不過明顯元氣已大傷。今次「大地震」嘅震央喺Ａ場，噚日急插
６﹒５巴仙之後，今日走勢仲係好反覆，喺４４３１至４６９８點區間上上落落，最終微跌
０﹒２巴仙收報４６１１。
　　香江呢邊都未有方向，全日高低波幅都有三百幾點，收市報２７４２４，輕輕碌低３０點。
國貨就繼續受中資金融股拖累，跑輸大市，跌７９點報１４１０３。不過全日主板成交一Ｄ都唔
少，約有２０４８億。缸友今個周末真係要輕鬆一下，再喺傳統「六窮月」激鬥一番吧！
　　
＊Ａ仔大上落收市微後退，香江失方向國貨仍憔悴＊

　　唔單止國家隊匯金今年首次出手掟貨，唔少公司股東見個市回番Ｄ，都怕錯失「ＣＡＰ水」
良機。好似恆大地產（０３３３３）負債咁鬼高，之前股價一路都無起色，難得４月份開始有力
衝高，足足翻咗一番去到最高８﹒４銀。家陣宣布折讓１８巴仙配股，淨籌４６億銀，仲要畀德
銀唱淡，話ＣＡＰ水都無助改善彩政，叫缸友繼續沽貨。結果復牌之後大插水，５蚊關一度失守
，收市逾１０５億銀超大成交蒸發２７巴仙，收５﹒０５銀，慘！
　　康臣葯業（０１６８１）就仲慘，股價都唔係升咗好多，但失驚無神被股東Ｇｕｉｏｄｚ折
讓最多近９巴仙減持４５００萬股，套現２﹒７億銀，而今朝市前就錄得３億銀大手交易。隻股
由頭跌到落尾，埋單跣低８巴仙收５﹒８８銀。

＊恆大伸伸手有貨急急走，康臣被減持也來眉頭皺＊

　　自從阿爺話要大力發展「互聯網＋」之後，科網股氣勢都幾強。今日商務部就話將會啟動零
售電子商務「十三五」規劃編制工作；另一方面，又有報道話互聯網金融監管意見可能會喺年底
出台。股王ＱＱ（００７００）一度領軍向前衝，不過收市前回穩，得番０﹒３巴仙升幅報
１５５﹒７銀。
　　其他科網份子表現仲勁；當中，中國軟件（００３５４）同華為等公司簽署工業４﹒０協定
，引領傳統製造業互聯網＋轉型。粉絲見到公司咁積極搵生意，當然入貨力撐喇，以逾５億銀推
高股價逾９巴仙，報５﹒４６銀，仲一度見５﹒７１銀再創上市新高！金蝶（００２６８）、擎
天軟件（０１２９７）都有５至６巴仙進帳。
　　
＊科網齊起動愈細粒愈美，瑞銀來祝福招商局威威＊

　　中廣核電力（０１８１６）今個月表現都好強勁，特別係最近幾日，交投明顯轉趨活躍，大
部分時間都沿著十天線樓上攀升，仲以近１４億銀收高４巴仙，報４﹒８４銀，睇嚟要衝破
５﹒１銀上市新高都唔容易喎。
　　藍戰士嗰邊，招商局（００１４４）畀瑞銀吹起咗，出報告話深圳港口整合對經營有正面幫
助，會增加盈利１０至１５巴仙，重申「買入」評級，並將目標價由３４銀升到去４１銀。今日
埋單就踢高３巴仙收３４﹒２銀，係最威水藍戰士。而建行（００９３９）收市之前突然發力，
倒升番２巴仙收７﹒７９銀，衝咗上嚟排第二名，話咁快就走出匯金掟貨陰霾，叻！

＊建行尾市勁港鐵又加價，超凡甚反覆華泰暗盤漲＊
　
　　又加價喇…港鐵（０００６６）宣布，自下個月２１號開始，平均加價４﹒３巴仙，部分路
線仲會加６巴仙添！老老實實，近呢幾年港鐵真係成日都出現故障，依家又宣布加價，希望佢唔
好淨係識加價，仲識得改善吓服務喇。今日股價本來升近３８銀，但之後差唔多無晒升幅，得番
３７﹒１５銀，唔通連Ｄ股東都唔鍾意佢加價？！
　　超凡網絡（０８１２１）以配售形式上市，咁啱遇正魚缸呢排地震，今朝開市最高見
３﹒５９銀，高配售價０﹒２５銀逾１３倍之後，就極速急墜到最低０﹒６銀，最後只得１蚊收
市，以配售上市嚟講，表現認真麻麻。
　　熱爆全城嘅華泰六八八六（０６８８６）將會下星期一（１日）隆重登場，收市之後暗盤開
報２７銀，高２４﹒８銀招股價近９巴仙，唔計手續費，暫有４４０銀進帳。假期愉快，請請！
　　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。