《小傳日記》阿爺未放榜，缸友眼光光；旺旺突急升，破頂好輕鬆！

　　《小傳日記》呢幾日缸外天氣真係好難捉摸，一時就熱到成三十度，一時就天陰陰吹冷風，
帶少件衫都隨時中招冷親。不過，今日（１４日）缸內都算風平浪靜，雖然上星期五（１１日）
晚花旗國仲係死氣沉沉，納指連４０００點大關都被淡友攻陷，加上「滬港通」效應都炒得七七
八八，估唔到香江都仲頂得住，今朝低開近百點之後，全日就喺二萬三關窄幅上落，完場升３５
點收報２３０３８，二萬三關又失而復得。當然成交就無得同上星期尾比較啦，全日得番６１１
億銀。國指就踢高１５點收１０２４４。
　　睇嚟缸友們唔單止等緊放復活節假，仲等緊後日（１６日）祖國首季ＧＤＰ放榜。其實上星
期國務院總理李克強一早放咗風，話ＧＤＰ比７﹒５巴仙「高一點，低一點」都叫做合理，而孖
屐都一早預咗ＧＤＰ大約得７﹒３巴仙，所以除非有好大出入，否則對魚缸影響唔會太大。

＊等緊ＧＤＰ險守二萬三，大象同中移腳軟唞唞先＊

　　今日個市唔係好升得起，係因為兩大重磅股大象（００００５）同祖國移動（００９４１）
都雙雙出現回吐，前者升破８０銀大關之後就腳軟，完場跌０﹒６巴仙收８０﹒３５銀，後者過
去大半個月已經累升逾１５巴仙，上星期炒「滬港通」效應，都衝破唔到百天線（約７５﹒９銀
），惟有歇一歇再衝過，埋單唔見１巴仙收７３﹒９銀，都仲企係十天線（約７２﹒７銀）樓上
，形勢都未算轉弱。兩隻重磅股加埋，都拖低咗大隻佬指數３２點。
　　除此之外，祖國地主都腳仔軟，又有路邊社消息爆料，祖國多個城市開發商都為咗谷銷量，
而靜俏俏減價促銷。早排畀機構投資者掟貨嘅潤地（０１１０９）就唔見逾１巴仙收１７﹒５２
銀，係第二差表現大隻佬。
　　反而，旺旺（００１５１）散場前以黑馬姿態跑出，突炒高逾５巴仙收１３﹒０６銀，仲創
埋上市新高見１３﹒１銀。全日為大隻佬貢獻１４點，仲勁過港交所推高１３點嘅成績，當然穩
坐最勁大隻佬寶座啦！

＊降價谷銷量潤地無運行，生發發續彈港府笑開顏＊

　　至於上星期五做一哥嘅生發發（００３８８），今日就繼續向上衝，最高去到１５２銀創逾
兩年半高位，成交都有２８億銀，完場升２﹒６巴仙收１４９﹒８銀。不過，最開心嘅應該係香
江政府啦！話說，港府喺２００７年９月，突然出手撐生發發，以平均價１５５﹒４４銀入市，
成為最大單一大股東，揸住５﹒８８巴仙股權。但眾所就知，生發發過去呢幾年股價幾咁唔掂，
港府都無奈迫住坐艇。等咗足足超過六年半，終於見曙光啦！
　　仲有股王ＱＱ（００７００）上星期經歷咗「大起大落」嘅刺激後，最新宣布月底開放微信
廣告，希望可以增加收入。咁識得搵生意，粉絲上半場都安心買貨，仲一度升２巴仙，幫手推高
大隻佬。點知食完午飯返來，市傳獲批與深圳前海成立民營銀行，但股價都無力，最終靠穩以
５２６銀收場。
　　
＊粉絲唞唞氣ＱＱ升唔起，券商兩面走鑊氣唔太夠＊

　　生發發就可以繼續食住「滬港通」效應，而券商股上星期就已經落鑊狂炒。雖然事隔一個周
末，依然有零星炒風。第一上海（００２２７）再進帳９巴仙，連續３個交易日累計升咗逾７１
巴仙，真係巴之閉。英皇證券（００７１７）都升逾７巴仙，創近３年新高。
　　不過兩隻上周熱炒嘅申銀萬國（００２１８）就回吐逾４巴仙，收報３﹒０５銀；國泰君安
（０１７８８）今日停賽，遲吓有股價敏感性公告要交代。
　　幾隻中資券商股表現都麻麻，大佬中信証券（０６０３０）跌咗逾２巴仙收報１７﹒２６銀
。銀證（０６８８１）、海通證券（０６８３７）都唔見咗近３巴仙，後者好彩守住條百天線。
　

＊環保股走鬼中滔無氣勢，光伏暗無光風電心慌慌＊

　　魚缸轉趨平淡之際，環保股忽然泛起暗湧。從事污水處理嘅中滔環保（０１３６３）錄得
「８連陰」，今日再被質低９巴仙，煉成「９陰真經」，收報４﹒２３銀。北控水務
（００３７１）跌咗超過４巴仙。太陽伯伯唔夠猛，光伏股即刻無嚟朝氣。啱啱話配售換股債嘅
君陽（００３９７）瀉咗逾１４巴仙，收報０﹒０８５銀。同行興業太陽能（００７５０）、漢
能太陽能（００５６６）分別挫逾６和近５巴仙。
　　風電股亦霸氣全失。中國風電（００１８２）無啦啦跌成６個巴仙，收報０﹒５９銀。華電
福新（００８１６）就唔見逾５巴仙。中傳動（００６５８）尾市有番買盤支持，跌幅收窄至逾
２巴仙報５﹒６５銀，但係都守唔住５０天線。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。