《小傳日記》六連升斷纜，唞完再闖關！

　　《小傳日記》香江好友噚日（１８日）寫下六連勝佳績，創今年新高後，今日（１９日）梗
係要唞吓儲吓電啦。道指同標普噚晚借住美國銀行業績靚，兼軟銀千億併購兩大好消息，齊齊踢
高少少再創新高，恆指今日開市都要回吐番６８點報２１７３４，之後雖然一度跌近二百點，但
相對近排升咗咁多，跌少少反而更健康吧！
　　總結全日表現，恆指埋單唔見１２９點報２１６７３，六連升斷纜；國指就碌低１０２點報
８９８８。個市要回氣，成交當然唔會多，錄得近５５０億銀。

＊東亞掀風波麥記降其級，瑞信潑冷水賭仔勿心急＊

　　東亞（０００２３）狙擊戰平息無幾耐，第四大股東及對沖基金Ｅｌｌｉｏｔ再開火，向東
亞銀行、總裁兼主席李國寶以及其他多數董事告上公堂，提出有關不公平損害嘅訴訟。李國寶轟
對方自私同有預謀，話會強而有力咁去應對。麥格理即刻將評級降到「中性」，缸友沽貨等睇戲
，今日東亞跣低接近２巴仙，報３１﹒１５銀。至於同行大新金融（００４４０）就被麥格理升
級至「跑贏大市」，今日行前近３巴仙至５３銀。
　　近期馬交賭仔表現唔錯，股價都轉勢向上走，不過瑞信就潑冷水，話孖屐高估咗賭仔嘅價值
，風險回報都唔吸引，賭仔冷靜番，金銀二獸金沙（０１９２８）同銀娛（０００２７）分別向
下踩低近１巴仙同超過２巴仙，報２７﹒５５銀同２４銀，永利（０１１２８）就微微潛水唔夠
１巴仙。

＊盈喜派得爽華置Ｐａｃｋａｇｅ好，細摩畀個讚思捷高高高＊

　　「Ｐａｃｋａｇｅ好好」嘅劉鳴煒，家族公司華置（００１２７）Ｐａｃｋａｇｅ都唔差，
預計上半年虧轉盈，收入可能按年增長一倍左右。唔單止咁，仲宣布要派中期特別息２﹒１銀冧
粉絲。華置今日受熱捧，尾盤再升多一輪，最終爆上近１７巴仙，報２１﹒１５銀，突破２０銀
關口！
　　國泰（００２９３）上月載客人次按年上升超過２巴仙，如果以收入計算，增長率都有超過
１巴仙。瑞信話，香江國際機場又要收建設費，又要上調降落費同停泊費，國泰隱憂夠晒多，唔
好咁快炒底，結果國泰就低飛近３巴仙，得番１２﹒２銀。
　　思捷環球（００３３０）預計全年可以達到收支平衡，細摩畀個讚，全日跑上近一成，報
６﹒６７銀。友邦（０１２９９）下星期四（２８日）就派成績表，今日先微微行前唔夠１巴仙
，埋單報４８﹒８５銀。

＊大行來護航瑞聲乏反應，四環忽回購個價變精靈＊

　　舜宇光學（０２３８２）畀瑞信睇好，維持「跑贏大市」評級，畀「他屐」３２﹒５銀，股
價逆市彈高近１巴仙，收報２８﹒６銀。另一大行大和就話瑞聲科技（０２０１８）雖然年初至
今炒高咗４５巴仙，但就話升幅唔過分，仲升該股盈測，畀「買貨」評級，「他屐」由６８蚊升
到７８蚊，而今日股價就升得一個價位，收報６７﹒８銀。
　　四環（００４６０）早前發完盈警噚日股價大跌近６巴仙，但原來四環噚日拎咗大約
８５６８萬銀回購，今日隨即反彈近９巴仙，仲高過盈警之前！
　　錦州錢莊（００４１６）之前預料半年純利增加唔少過一倍半，升勢一浪接一浪，噚日踢高
超過１３巴仙後，今日再升近一成，報７﹒２５銀，仲試過高見７﹒２６銀創新高添！

＊錦州成績靚彈起來慶祝，半新丁熱炒表現甚不俗＊

　　魚缸升咗六日終於要唞吓，但有幾隻半新丁唔心熄，繼續向前衝。ＦＵＴＵＲＥ　ＤＡＴＡ
（０８２２９）噚日炒高逾２４巴仙，今日再一支火箭飆升６５巴仙，報１﹒２７銀，比配售價
０﹒５８銀足足高１﹒２倍，仲曾經高見１﹒３３銀破頂添！中國金典（０８２８１）都唔弱，
飛起近３１巴仙，報０﹒４９銀。星星地產（０１５６０）亦一度踢高近８巴仙創新高３﹒４２
銀，可惜最終倒跌近２巴仙，埋單３﹒１２銀。
　　協鑫新能源（００４５１）個仔打算發行最多廿億人仔債券，急急彈起６巴仙，報０﹒３５
銀。但光伏街坊興業太陽能（００７５０）表現卻差天共地，碌低逾７巴仙，得返２﹒９２銀；
佢先前「五供一」，結果收到２﹒１４億股有效接納，超購近５４巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。