《小傳日記》魚缸臨尾又頭暈，ＱＱ破頂開香檳！

　　《小傳日記》話咁快，９月份過咗一大半。今個星期嘅焦點，花旗同東瀛國都公布晒議息結
果，花旗息魔未夠鐘嚟搞搞震，香江魚缸就繼續開Ｐａｒｔｙ，噚日（２２日）再一次收復
二萬四，雖然最後都守唔穩，但至少都上番十天線樓上。
　　今日（２３日）幾重磅藍戰都好出色，股王ＱＱ（００７００）更再創新高，友邦
（０１２９９）亦都創逾一年高位；只可惜一班中資金融股可能近排衝得太勁，開始有Ｄ腳仔軟
，要停低唞唞。恆指今朝高開７６點後就陷入牛皮戰，其後一路喺２３７００水平升吓跌吓，無
晒方向。點知又係尾市無力，中資金融股被突襲，搞到恆指收低７３點報２３６８６，國指更碌
低９７點報９７９６。全日成交得番７２０億。
　　不過溫馨提示，下星期五（３０日）就係季結，同埋十一黃金周就快到，小心魚缸突然掀起
巨浪呀！　
　
＊內銀甩後腳工行最曳曳，新高又新高ＱＱ好氣勢＊

　　「股王」ＱＱ再次大發神威，衝前近２巴仙，報２１８﹒２銀，仲曾經破頂高見２２０﹒８
銀。ＱＱ嘅微信朋友圈將會開展自助廣告業務，花旗就率先讚好，話可以幫助將廣告業務變為收
入。
　　李超人又有新行動，長建（０１０３８）據報會帶頭競購米字國國家電網旗下燃氣分銷業務
，大和話如果成事，股本回報率會多達１３巴仙。長建全日彈高２巴仙，報６９﹒２銀。
　　工行先前獲大和上調「他屐」到５﹒３元，今日卻腳軟軟，趴低３巴仙，收４﹒８８銀。其
他街坊都都唔見１至２巴仙。
　　瑞聲（０２０１８）一樣咁差，雖然瑞信話孖屐對無線射頻同機械部件業務過度憂慮，佢依
然瞓低逾１巴仙，得返８１﹒４５銀。

＊預祝新動作長建先踢高，大行來踐踏賭仔有點糟＊

　　高盛預期聯通（００７６２）下半年盈利會加快回升，評級升到「買入」，目標更大幅上調
三成有多。聯通開賽競價時段已經飆前近７巴仙，最終都斬穫逾４巴仙，報９﹒４８銀，仲係最
好打藍戰士。街坊中移動（００９４１）被降級至「中性」，應聲碌低近１巴仙，報９６﹒３５
銀。至於中電信（００７２８）就微微行前唔夠１巴仙，埋單３﹒９８銀。
　　８月馬交旅客人數２８８萬，按年跌半成，祖國同胞訪客更減少５﹒５巴仙。數據曳曳，大
和更加插多刀，話人幣可能繼續貶值，會拖累中場賭收，又叫缸友首先沽走永利（０１１２８）
。永利即刻跣低近３巴仙，收１３﹒１２銀。美高梅（０２２８２）亦唔好彩，畀瑞信下調評級
，跟住踢跌近３巴仙，收１３﹒１６銀。

＊高佬在發功電信榮辱見，中移頭耷耷聯通炒番轉＊
　　
　　花旗數據顯示，上星期原油庫存意外減少，帶動油價連升兩日，不過孖展又驚油組就算傾掂
數，都好難緩和全球供應過剩嘅問題。睇嚟油價想回復昔日光輝，都唔知要等到幾時。不過，缸
友都一於少理，噚日獲麥格理唱好嘅中石油（００８５７），今日再逆市向上爬高０﹒６巴仙收
５﹒０６銀，其中石化（００３８６）同中海油（００８８３）都成功企穩。
　　丹楓（００２７１）有好消息！皆因主席兼控股股東戴小明以「筍」價易手，２﹒７５銀賣
咗３６巴仙股份畀天安（０００２８），較前收市價溢價逾１５巴仙。賣完之後，「小甜甜」龔
如心遺產仲持有逾２３巴仙股權。傾到靚價，難怪丹楓復賽跑前逾１１巴仙收２﹒６６銀。同系
宏霸（００８０２）同安寧（００１２８）就無大變動。
　　
＊丹楓與德勝易手高高收，匯彩夠鑊氣缸邊炒個夠＊
　　
　　雖然大市悶悶哋，但係一班魚毛炒得不知幾開心，升幅榜首５名都有兩至四成進帳。第一德
勝（００９１８）就同丹楓一樣咁巴閉，主席以超筍價「賣囝」，全面要約價０﹒９４６３銀，
較前收市價溢價三成。咁好消息，粉絲當然舉腳支持，今朝第一德勝復牌已衝咗上嚟，埋單都保
持近３１巴仙升幅收０﹒９４銀，升近要約價！
　　匯彩（０１１８０）呢幾日表現只能用一個字形容：勁！股價悶咗成年，一路喺１﹒２銀左
右橫行，而最近成交明顯增加，單係過去兩日就衝高咗一成，今日仲誇張，公司向濠賭角子機廳
澳門摩卡娛樂場創辦人張璜，以溢價逾８巴仙發行５千萬份認股權證，行使價係１﹒４銀。有猛
人坐陣，今日匯彩爆升近３９巴仙收１﹒８３銀，係最威水個股。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。