《小傳日記》四度闖摩指，成敗今晚知；魚缸低低收，誠哥傳退休！

　　《小傳日記》今晚凌晨四點半，就知道Ａ場可唔可以成功入摩喇！老老實實，暫時嚟講，孖
屐都唔算太有信心，如果今次都「食檸檬」，就已經係第四次闖關失敗。雖然有分析話就算失敗
咗都唔會有太大影響，但小傳就擔心淡友會借勢出兵，恆指隨時由「整固」變「尋底」都唔定。
　　重要時刻前夕，恆指今朝就高開約１０３點見２６０２８，重上二萬六關，但Ａ場氣氛凝重
，全日微跌４點收３１４０，搞到香江呢邊嘅中字輩都腳軟軟，拖累恆指全日倒跌８１點報
２５８４３，國指就瞓低５２點報１０４６８。全日魚缸成交近６６８億銀。

＊超人傳退休長和唔覺愁，ＱＱ好風騷友邦創新高＊

　　中午傳出超人打算出年退休，但會轉做高級顧問，發言人就話有確切時間表時會正式公布，
總之強調超人身體非常健康喇！一號超人（００００１）跣低唔夠半個巴仙，收報９８﹒５銀；
長實（０１１１３）就跳高近１巴仙，報６１﹒８５銀；和記電訊（００２１５）早前獲大摩升
目標價同評級，今彈起６巴仙，報２﹒８９銀。
　　納指造好，帶動股王ＱＱ（００７００）向上走，今日試過高見２８３﹒８銀破頂，不過尾
市無力，最終行前唔夠半個巴仙，埋單２８０銀。ＡＩＡ（０１２９９）亦都試過見５７﹒６銀
創新高，但同樣高處不勝寒，結果穩收５７﹒１銀。

＊航運股出海領展無人愛，３億解僱費劇飛好閉翳＊

　　受惠油價跌到７個月低位消息影響，航運股今日揚航出海，東方海外（００３１６）跑前逾
８巴仙，報５２﹒６５銀；太平洋航運（０２３４３）亦有約３巴仙進帳，報１﹒６９銀。
　　劇飛（００２９３）之前高層炒燶油之後大刀闊斧咁炒人，傳要畀３億解僱費，結果今日低
飛超過１巴仙，報１２﹒２２銀。
　　領展（００８２３）末期息今日除淨，缸友們知有份收息之後都急住沽貨，最終跣低逾２巴
仙，報６０﹒７銀。

＊貴賓廳旺場大行齊唱好，他屐獲調升銀娛好精靈＊

　　摩通話，受貴賓廳賭收帶動，估計今個月博彩收益會按年大增３０至３３巴仙。一眾賭仔即
刻開晒ｐａｒｔｙ，新濠國際（００２００）跳高近３巴仙，報２１﹒３銀；美高梅
（０２２８２）更加飛起近４巴仙，報１７﹒６４銀。
　　德銀都加入唱好，睇好有比較多貴賓廳業務嘅銀娛（０００２７）、永利馬交
（０１１２８）同澳博（００８８０），齊齊上調「他屐」。永利、澳博彈高近２巴仙，分別收
１８﹒６同８﹒３８銀。銀娛亦踢高近２巴仙，埋單４８﹒６銀，成為全日最叻藍戰士，仲一度
創兩年半高４９﹒２銀添！

＊大行畀個ＢＵＹ高偉好鬼ｈｉｇｈ，半新丁落鑊缸友有斬獲＊
　　
　　做蘋果生意嘅高偉電子（０１４１５）自從喺上個禮拜五發盈喜，話上半年盈利增長會坐火
箭，當日爆升近兩成之後，今日獲高誠證券將評級由「持有」升去「買入」，「他屐」由
３﹒１銀升到去４銀，刺激股價全日升咗逾７巴仙，仲突破埋３蚊關，最高去到３﹒１４銀，收
報３﹒０４銀。
　　創板半新丁ＩＴＰ（０８４４６）喺上個禮拜三入魚缸，第一日開ＳＨＯＷ就升咗差唔多成
倍，之後唞咗兩日又嚟過，今日就彈高咗超過五成，收０﹒９９銀，大嗱嗱較招股價０﹒３銀超
過兩倍，由頭揸到落尾嘅缸友仲唔發達！
　　上星期五掛牌嘅建成（０１６３０）第一日就玩跳樓機，高低位差天共地，分別喺０﹒９銀
同０﹒４２５銀，跟住噚日仲跣低１２巴仙，嚇到班缸友心臟病發咁滯。不過今日又彈高咗近三
成，報０﹒６１銀，比招股價０﹒３８銀高超過六成，真係心血少Ｄ都唔掂。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。