按盤價 
《小傳日記》講足咁耐嘅美國《生物安全法案》噚晚通過咗參議院聽證，喺參議院國土安全
與政府事務委員會上以壓倒性同意票數通過聽證。消息一出，今朝藥明全系三股以競價下限低開
一成半，全日雖然有上有落，但最後藥明生物（０２２６９）同藥明康德（０２３５９）都要跌
超過兩成收場。
雖然今日各大媒體都大字報道「通過《生物安全法案》」，但實際上今次只係通過參議院嘅
聽證，距離成為法案都仲有好幾關要過，一來要先再通過眾議院版聽證，之後要再進行一段時間
嘅審議同修改，定稿之後先再分別經眾議院同參議院投票表決，先可以正式成為法案。
換句話講，都有時間傾，藥明當然奮力一博。《彭博》引述藥明康德喺公開文件提到，公司
喺供應鏈舉足輕重，同全球最大嘅廿間製藥企業合作，如果《法案》通過，將會影響部分重要藥
物嘅生產。而呢一點都係《法案》未獲得全票通過聽證嘅一點，今次係１１比１票通過，唯一反
對嘅共和黨參議員就係打著有機會影響美國藥物供應鏈嘅原因來反對。
呢一點都值得美國議會思考，假如為咗「打壓中國牌」而影響咗部分醫藥企業利益，更嚴重
係影響藥物供應之後嘅人道問題，並唔係美國咁容易豁得出去嘅一點，若果牽涉人道問題，一定
會引起美國民間嘅廣泛討論，呢個都會係《法案》通過嘅一大阻力。所以《彭博》都有報，有傳
議案發起人Ｇａｒｙ Ｐｅｔｅｒｓ都正係考慮修改法案，可能會改為允許現有合同繼續實施，
甚至有可能剔除部分中國生科公司。
通過聽證嘅意思即係議案獲個別委員會認可，認為可以交上大會審議，隨後可能再會經歷好
多變數，仲要分開參議院同眾議院嚟傾，仲有相當長時間來斟酌同修改，一時三刻一定無咁快可
以交上白宮簽名。
可惜就係雖然議案時真時假，但係藥明股價對於消息嘅敏感度極高，一條消息就可以造成一
兩成波動，當中淡友絕對「功不可抹」。連同今日四日以來藥明生物有三日嘅沽空金額都超過兩
億，就算前兩日成交減少，沽空金額都過億甚至係兩億，今日藥明大跌淡友都贏唔少。雖然Ａ場
限制咗沽空，但係魚缸呢邊都仲係好活躍，沽唔到Ａ股就沽港股，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】內地再增8個自由行城市，餐飲業倡設大灣區身份證，以便利更多人來港消費，你是否認同？► 立即投票
