按盤價 
《小傳日記》港股日升日跌，有人歡喜有人愁。３月適逢業績期，亦係各大小上市公司顯示
實力嘅時候。京東集團（０９６１８）前日收市後公布業績，條數靚靚仔仔，股價昨日逆市炒上
６％，升幅冠絕藍籌。但係佢嘅老對手國美（００４９３）就陰功豬啦！股價連跌五日，由３月
１日嘅４仙１，今日最低跌到得２仙，再創新低。短短一個星期，市值唔見咗一半。唔止市值縮
水，近年國美嘅存在感愈來愈低。筆者今日唔講，相信好多人都已經唔記得呢隻股票。曾經叱吒
風雲嘅民營企業，如今幾乎被遺忘，實在有啲令人唏噓！
喺電商仲未崛起嘅年代，國美同蘇寧，雄霸成個內地家電市場半壁江山。但係，雙雄稱霸的
年代好快就被改寫，因為線下嘅電商已經蠢蠢欲動。２０１２年，京東集團創辦人劉強東正式向
線下電器零售商宣戰，呢場戰被稱為「８１５電商價格大戰」。雖然最後被發改委叫停，但京東
經此一役，聲名大噪。並且喺兩年後正式超越蘇寧同國美，成為電器零售行業嘅龍頭，為內地電
器零售揭開新一頁。時至今日，線上同線下嘅老對手實力愈來愈懸殊。京東集團舊年賺大約
２４２億人仔，而兩個老對手國美同蘇寧最近幾年就年年虧損。
＊杜鵑救國，成一時佳話＊
國美動盪嘅時候，曾經發生一段小插曲。話說喺２０１０年，創辦人黃光裕被判刑後，國美
嘅資金鏈一下子變得緊張起嚟。當時嘅ＣＥＯ陳曉建議引進風險投資者，以股份換取現金應對難
關。傳聞當時黃光裕夫人杜鵑，立即挺身而出，話「公司需要多少錢？我有！」原來，黃夫人之
前買落嘅保險同信託，積累咗一筆財富。於是就攞出嚟，幫公司渡過難關。係真係假無從稽考，
但「杜鵑救國」（國美）就成為一時佳話。特別係保險公司嘅代理，都鍾意攞嚟做推銷實例。
國美近年動作多多，自從黃光裕喺２０２１年回歸國美後，集團不斷求變。一時搞加盟店，
一時搞國美超市，又搞直播帶貨，實行線上線下全方位出擊。可以睇得出，集團喺逆境下仍然發
揮永不放棄嘅精神，單係呢份鬥志就值得鼓掌。之但係，一家企業嘅成功，除咗鬥志之外，仲受
到好多因素影響，篇幅有限，講住咁多先。（ｖｓ）
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】內地再增8個自由行城市，餐飲業倡設大灣區身份證，以便利更多人來港消費，你是否認同？► 立即投票
