按盤價 
《小傳日記》車業內捲加劇，幾乎每日都會有消息出來。近期業績期，最新小鵬
（０９８６８）公布，上年經調整全年虧損擴大到去９４億人仔，而２０２２年同期係８４億人
仔，好在總收入按年多一成四到３０７億人仔，全年交付量都多一成七到１４﹒１６萬架，先叫
做有返啲交代，但係無錢賺就係無錢賺。
小鵬老闆何小鵬都坦誠自己係廠佬一個，「不喜歡搞一堆經營的事情」，專心研發新車嘅佢
自認搞生意真係有不足。就喺上年，為補呢個短板，何老闆成功請到長汽（０２３３３）三十年
老臣子嘅王鳳英過檔做總裁，主力負責產品規劃、產品矩陣以及銷售體系，擺明將營銷全權交畀
王鳳英打骰。
王鳳英過檔前喺長汽由前線做到上副董事長，為長汽引入經銷制度，又建立咗專營店同售後
服務部門，戰功赫赫但都由得佢跳槽小鵬。王鳳英身為造車界老行尊，自然有自己嘅板斧。據某
啲報道引述內部員工提到，王鳳英一到小鵬，成間公司嘅節奏都加快唔少，駕駛系統、新車型開
會過後無耐就可以正式落地。整體效率嘅提升，雖然業績上未必睇到，但就係公司運作同生產嘅
關鍵，可以話係公司生存嘅脈搏。
雖然小鵬業績過去一年都只係大約持平，但自王鳳英加入之後，公司管治上都悄悄起革命。
王鳳英一上場，就將自己喺長汽嘅得意之作喺小鵬照辦煮碗，引入經銷模式。何老闆就講過，
２０２３年公司淘汰１３０間以上門市，但就引入１６０間經銷舖頭，今年將會加速發展三、四
線城市嘅下沉市場，第二季起仲會加快終端交付速度，提升經銷商積極性，同時加強管控庫存，
避免經銷商銷售模式出現問題。
小鵬最新宣布將會喺下個月推出１０至１５萬人仔嘅品牌「ＭＯＮＡ」，就係之前小鵬同滴
滴收購嘅項目，正好切合搶攻下沉市場嘅計劃。以上種種都流露出王鳳英嘅管治風格，相信何小
鵬都係極為信任王鳳英嘅管理。
汽車業打緊紅海戰，中價層飽和就要發展下沉市場，而內房發展下沉市場唔同，政策面上有
「汽車下鄉」支持，而且車平過樓，車企要入三、四線城市相對有底氣。如今小鵬宣布搞１０萬
級電動車，就係押注咗喺政策上面，連同王鳳英嘅管治智慧，小鵬未必唔可以成為下隻跑出嘅新
勢力，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
全新節目《說說心理話》講述被情緒困擾真實個案，情緒病最終如何走出低谷？► 即睇
