魚缸上個未能完成嘅任務，今日終於補飛成功，恒指時隔八個月終於重上19000。雖則話重上19000，但升幅只係得百幾點，而今日都唔係好似上個禮拜五咁全面造好。好似藥股今日都係個別發展，小至連有好消息嘅藥明系都已經有唔同走勢。
美國眾議院版《生物安全法案》準備今個禮拜三(15號)表決，即係香港時間16號就會有結果。《路透》最新報道提到，《法案》唔打算一刀切要美國企業斷絕同中國生科聯繫，計劃提供8年限期，即係到2032年先要完全執行。孖屐同業界都認為8年時間足夠美國企業慢慢適應同執行，所以都算係利好消息。
而藥明系開市普遍開party，藥明康德(02359)升15%，藥明生物(02269)升8%，藥明合聯(02268)都升7.5%。不過藥明系價咁殘，升高些少就有人趁勢走佬，都沽到跌返轉頭，藥明生物一度要倒跌8%。結果全日藥明系有升有跌，收市藥明生物跌3.5%，藥明康德升4.5%，藥明合聯慘跌9.2%。
因為延長咗死線，孖屐普遍都會將呢個消息視為利好，但其實鬆手咁多，最終目的都係為咗通過，而通過咗之後即使係死線延後，最終都係要實行。即時嚟講，藥明系唔會一次過美國生意清零，但係攤長咗八年，係畀美國公司慢慢剝離對藥明嘅依賴，變相藥明未來八年都要面對美國客戶逐步減少，每年都會成為藥明賺錢嘅秤砣，要抵銷影響就要搵返一樣數量嘅非美國客戶。
不過好友就會覺得，八年流流長，中間仲可以有好多變化，隨時再放寬又唔定。但要留意寬限期啱啱好係八年，中間仲會經歷兩次大選年，可能四年後又到大選年會探討要唔要收緊，再到八年後另一次大選，條《法案》又可以喺櫳底摷出嚟用，對美國兩黨真係樂此不疲。而對於藥明，有錢好難唔賺，即係未來八年都會成為美國政客嘅扯線公仔，實則上只係即時死亡變成慢性毒藥，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
etnet榮獲HKEX Awards 2023 「最佳表現證券數據供應商」大獎► 了解詳情
39,065.26
