《小傳日記》有傳阿爺即將結束對滴滴出行嘅網絡審查，滴滴Ａｐｐｓ仲可能喺今個星期上
番架，滴滴隔晚喺花旗嗰邊大升超過兩成，唔少中概股升埋一份。只不過，睇番ＡＴＭ股嘅
ＡＤＲ走勢麻麻哋，期指開市前半個鐘都跌緊，就知今日唔對路喇。魚缸噚日升咗近６００點之
後，今日落番少少，除咗隻京東（０９６１８）升得好啲之外，其他科技股走勢就無早輪咁強，
唔通滴滴呢單嘢無乜刺激作用？
其實，呢個消息喺噚日晏晝公布，好多中概股已經升得好興奮，臨尾推高魚缸再升多啲，晨
咁早升定先，花旗嗰邊嘅中概股只係跟住升啫。再睇長啲，由５月低位１９１７８到噚日高位
２１６９１，呢度升咗超過２５００點喇，滴滴消息炒完，阿爺穩經濟措施又炒得七七八八，再
無特別利好嘅消息出嚟，回番少少好都好正常嘅，大家唔需要睇得太重。
講番滴滴呢件事，依家消息係堅定流都係估估下，但當初滴滴要去花旗上市，而公司本身有
好多敏感資料，阿爺可能唔想呢啲資料畀美國佬知，所以即刻出招撳低佢。近日，滴滴召開臨時
股東大會，通過自願除牌方案，打算喺６月２號或之後提交退市申請，可能佢肯除牌，阿爺放佢
一馬都唔出奇。
至於咁樣係咪代表阿爺放過科網股？單講滴滴呢次消息未必反映到，反而呢排阿爺係咁講要
支持平台經濟健康發展，可能留意到監管措施幾影響到科網企業營運，要喺恢復經濟發展之間攞
個平衡，所以態度無咁強硬，對中概股嚟講係好事。只不過，阿爺點樣去扶持呢啲企業健康發展
要再睇，而且科技股估值仲係高，又無息收，呢類股票缸友都唔太ｂｕｙ，短期可能仲會反彈，
但講到一天光哂，重現昔日光輝就似乎言之尚早喇！請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。
【你點睇】辭任終院法官撰文指本港法治受干預，政府反駁強調不受政治壓力，你是否支持政府回應？► 立即投票
