《財自密碼》港股真係悶到訓著,每日唔係睇住個金管局要接幾多錢,就係睇住美國通脹如
何、加唔加息;連手機個股票TG谷都唔講股票,一係講今晚食乜好,或者預備移民嘅巴絲預備
成點,大家都無咩心炒股。
講返正題,聯儲呢一水加息,加就加硬啦,普遍認為都係加四分一厘。但問題在於,接落下
半年加唔加好?唔加就硬食輸入性通脹,繼續加落去又會夾爆銀行,所以港股由一月開始橫行咗
一季,基本上都係19000至20000點之間上落,有錢都拎去做美元定期,個個月成四、
五厘息,好過炒股。
炒股最怕就係無波動,所以呢一期都費事點執個倉位,因為就算點調整都係死,業績期過咗
呢個四、五月,基本上都無嘢可以做。唯一期待就係五一黃金周,一個就係澳門賭業會唔會有少
少起色,不過聽聞目前澳門人手依然唔夠,酒店房都開唔齊,又唔見大行走去問下澳門酒店
Booking夠唔夠full,所以都係睇五五波。
另一個就係內地消費同餐飲業,呢一水可能有報復式反彈咁出遊,但聽聞內地人睇嘅多、買
嘅少,加上經濟又未復甦,城鎮年輕人就業就唔係有太多好消息,所以呢一轉五一黃金周如果打
個平手,班消費股都可能抽升少少,但唔好預計會坐火箭咁。
金水我都係執好個行李,疊埋心水呢轉五一好好咁玩返轉算,DEL APP熄手機,勿念
!
百萬倉位如下(截至2023年4月25日收市)
======================
持有股份 持有股數 買入價 賣出價 浮動賺╱蝕 收市價 市值
------------------------------------------
復銳 8千股 15﹒8元 -2﹒88萬元 12﹒20元 97600元
海底撈 1萬股 23﹒6元 -5﹒28萬元 18﹒32元 183200元
理文造紙 1萬股 3﹒61元 -4000元 3﹒21元 32100元
無線廣播 1萬股 9﹒48元 -2﹒56萬元 6﹒92元 69200元
認沽 100萬股 0﹒07元 -2﹒40萬元 0﹒046元 46000元
總持貨 428100元
餘下現金 436700元
------------------------------------------
*編者按:本文只供參考之用,並不構成要約、招攬或邀請、誘使、任何不論種類或形式之申述
或訂立任何建議及推薦,讀者務請運用個人獨立思考能力自行作出投資決定,如因相關建議招致
損失,概與《經濟通》、編者及作者無關。
《說說心理話》與你分享遭遇欺凌該如何應對 教你兩個方法輕易彈走負面情緒► 即睇