《魚缸博客》唔知係咪一石激起千重浪,繼10月份有十家國企回購A股之後,呢排有唔少
公司決定回購股份,尤其大市跌到一仆一碌,依家恒指萬六關都危危乎之際,唔少財演都話恒指
估值偏低,而好多有實力嘅股份都低到難以置信,所以都見有唔少公司開始回購股份或大股東增
持。
好似前日(4日)藥明生物(02269)中途停牌,原因相信係集團喺嗰朝召開業務會議
,之後發通告話,今年同明年上半年極具挑戰,未來兩年只會有單位數增長,結果股價最多急插
近25%。尋日股份復牌後,今日集團就宣布6億美元回購計劃,藥明生物股價今朝高見
32﹒1銀,升幅達5﹒8%,收復部分失地。不過,今日想講下隻金沙中國(01928)。
金沙股價喺10月29日低見18﹒74銀之後逐步回升,尋日已經上番20銀,唔知係咪
見股價低殘、估值偏低,所以金沙今日都發通告話,控股股東Las Vegas Sands
Corp﹒ (LVS)擬增持股權,並已促使間接全資附屬公司VVDI(II)喺尋日同
一間金融機構訂立購股交易,VVDI(II)將會支付最多約19﹒5億銀融資金額去購買金
沙股份。集團話,以尋日收市價每股20﹒2元計,融資金額大約等於9660萬股,佔約
1﹒19%股權。
金沙截至今年6月底止中期賺1﹒75億美金(13﹒7億港銀),舊年同期就蝕7﹒6億
美金(59﹒6億港銀),大股東現時出手增持,或反映金沙未來有望恢復派息。股價今早曾迫
近50天線(21﹒48),技術上,上月底跌到18﹒74銀時,9日RSI亦跌到21,近
日走強可視為技術性反彈,如可突破50天線,首個阻力應該係24銀,至於支持,皆因大股東
已開始增持行動,相信18至20銀係重要支持,跌唔到幾多,建議喺20﹒3銀買入,止蝕位
可以定喺18﹒4銀,目標24銀。(pc)
《編者按》本欄搜羅即市傳聞,惟消息未經證實,《經濟通》亦不保證內容之準確性。
《說說心理話》與你分享遭遇欺凌該如何應對 教你兩個方法輕易彈走負面情緒► 即睇