按盤價 
《小傳日記》車業都算係目前神州競爭最大嘅行業，雖然係咁，但係仍然有唔少大小公司趕
住去分一杯羹。正因為競爭愈來愈激烈，車企都少不免明爭暗鬥：「明爭」就係用數字說話，賣
到幾多架車就係贏嗰個；「暗鬥」就自然係用口水花說話。
繼之前小鵬（０９８６８）反駁理想（０２０１５）每星期公布嘅銷售數字唔準之後，連龍
頭吉利（００１７５）同ＢＹＤ（０１２１１）都要打口水戰。近期吉利母企吉利控股集團資深
副總裁楊學良就喺自己微博發文，話之前喺微博嘅ＢＹＤ超話（超級話題，即係類似同好群組）
入面，某一個都係吹奏ＢＹＤ嘅ｐｏｓｔ入面，留意到下面留ＣＭ嘅人都有啲「古怪」，普遍都
只有一個關注，幾十個粉絲，而且都從來無自己出過ｐｏｓｔ，但係睇落都係人自己寫，唔似係
ＡＩ寫出來。
言下之意即係暗串ＢＹＤ請打手唱好自己。後來楊學良就再補飛，話知道自己身份來點出呢
點會比較敏感，但身為一個微博資深用戶，深受呢種生態困擾，反問「廣大網民真的會信這樣的
評論嗎？我們的品牌需要這樣一邊倒的溢美之詞嗎？」
如果係真，都難怪ＢＹＤ要養打手來吹奏自己，事實係關於ＢＹＤ嘅黑材料都係數之不盡。
真又好，假又好，傳言謠言都大把。如果學吉利楊學良話齋，唔用呢種「一邊倒的溢美之詞」，
咁就會係「一邊倒的唱衰之詞」，請打手都係要平衡返個論調。
講白啲間間都總有打手，不過緊要就係打手得來會唔會畀人知道，今次啲留言咁明顯，都難
怪會被吉利瞅到。不過調轉頭諗，楊學良又會專登去睇ＢＹＤ嘅群組，都好難唔令人覺得係有意
為之，可能其實就係故意入去捉打手出來貼堂，然後乘機瘀吓對手，即係其實搞完一輪都係吹奏
返自己，咁就打和啦，Ｓｕｐｅｒ！請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
全新節目《說說心理話》青少年不可以戀愛！？真實個案講述驚心動魄經歷► 即睇
