按盤價 
《小傳日記》就快係元宵節，即係農曆年已經差唔多過完，今個新正頭魚缸表現都尚算唔錯
，都係多得阿爺降完準再減息，先令ＡＨ場齊齊過咗個當旺嘅新年頭。
逢年過節，當旺又點止魚缸，神州嘅電影市道都一樣咁犀利。貓眼（０１８９６）噚日就出
盈喜，預期上年大賺８﹒８億至９﹒３億人仔，按年勁賺多七倍有多！貓眼就話，勁賺係因為上
年自家發行咗好幾套票房勁爆嘅戲，包括張藝謀出品嘅《滿江紅》就大收４５億人仔，另外《封
神第一部：朝歌風雲》同《八角籠中》都收超過２０億人仔！除此之外，貓眼亦提到線上賣飛業
務都係收入功臣，收入和ＧＭＶ均創歷史新高。
其實上年周不時公布嘅電影數據，一年幾個黃金檔期，都見全國電影票房又創紀錄新高，所
以貓眼會賺錢都唔意外，但大賺七倍有多個升幅都幾驚人，反映電影市道喺過去一年都喺恢復軌
道上。
但其實而家神州同胞嘅影視選擇都相當之多，並唔一定要入戲院睇戲，上網睇又得，煲劇、
睇動畫又得，甚至而家碌吓電話都會有微短劇睇到。微短劇近呢年幾先興起，但係佢比起其他影
視內容唔同，比起要觀眾主動撳出嚟睇，微短劇喺碌抖音、視頻號期間就會碌到出嚟，加上微短
劇特性係一播就係高潮，自然就可以捉實眼球。
雖然微短劇好有魔性，但電影市場仲站得住腳，皆因目前製作微短劇嘅成本都唔高，配樂、
場景、畫面、音樂等，比起真正嘅製作都好明顯質素低一啲，古裝劇就更加明顯。雖然睇落吸引
，但微短劇可以話係完全為爭取流量而生嘅產物，藝術性明顯不足，而電影喺大銀幕上映，預算
多好多，自然會吸引到追求質素嘅觀眾群。
以食飯來比喻，微短劇就好似零食，閒時食少少，滋味又過癮，但真係要食飯嘅話，梗係想
食返啲有質素嘅大餐。況且呢場大銀幕上嘅盛宴，廿幾蚊人仔就嘆到，對消費者嚟講當然係超值
，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
全新節目《說說心理話》青少年不可以戀愛！？真實個案講述驚心動魄經歷► 即睇
