按盤價 
《小傳日記》融創（０１９１８）今日就公布，多項重組條件經已滿足，境外債重組正式喺
噚日生效，總共發行咗９４﹒５億美金規模嘅債務工具，同時所持嘅其中１４﹒７％融服
（０１５１６）股權被用作部分重組對價以換取計劃債權人解除及免除相關現有債權嘅申索，合
共約值７﹒７５億美金。融創今日最高見過２﹒９５銀，差啲就重上３銀。
而除咗融創，今日成個內房都有好消息，外電報道阿爺方面正係搞緊一份「房企白名單」，
上榜嘅房企係獲得阿爺認證嘅「好公司」，可以獲得信貸、債權同股權融資等多方面嘅支持，不
過報道講明，就算上榜都唔係硬性規定銀行必須科水支持佢。
記得上年都係差唔多時候，阿爺公布咗「三支箭」救市策略，其實就係上面提到嘅信貸、債
權同股權融資。早幾日人行、金監總局同神州證監會召開金融機構座談會，再次提到要用好「第
二支箭」支持民營房企發債融資，簡單來講都係翻兜上年嘅「三支箭」。
２０２３年可以話已經跌足全年，臨別秋波孖屐都希望今年可以係上年嘅翻版，一樣係１１
月開始大反彈，結果到月尾又唔係無彈，不過彈吓又跌吓，上極都上唔到１８０００。事實上孖
屐係想有新料，「三支箭」都已經做咗差唔多一年，一出場時令孖屐睇好可以釋除資本市場疑慮
，重新吸引資金。不過時隔一年證明就算有資金肯再投資，都唔等同消費市場會賣帳，樓始終賣
唔到。
記得上年都曾經出現過「示範房企」，當時三間民營房企入選為首批示範房企，包括龍湖
（００９６０）、美的置業（０３９９０），仲有如今已債務纏身嘅碧桂園（０２００７）。當
中碧桂園入選「示範房企」，一年之後偏偏做咗最差示範。如今有傳白名單會有５０間房企入榜
，萬科（０２２０２）、龍湖同新城（０１０３０）等等都被傳係名單之列。不過「白名單」同
「示範房企」都有「異曲同工之妙」，而且報道講明係無對銀行嘅硬性規定，即係「白名單」就
係阿爺幫你印多隻「白兔仔」咁樣。
所以今日內房股雖然升，但係同上年「第二支箭」出台嘅暴升景象都差得遠，證明孖屐都明
白暫時措施方針都只係同上年差唔多，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
etnet榮獲HKEX Awards 2023 「最佳表現證券數據供應商」大獎► 了解詳情
