《小傳日記》上個禮拜五(19日)恒指公布季檢,無藍戰士被踢走,不過新加入4隻就各
有各精彩。百度(09888)經歷幾次大熱倒灶之後終於入隊,神華(01088)就成功繼
兩年前foul走之後再度入隊,另外兩隻就係冷門嘅翰森製藥(03692),同埋冷門中嘅
冷門周大福(01929)。
百度同神華入選,以市值嚟講就理所當然,雖然翰森比較唔係熱炒股,但計市值都係醫藥股
入面頭五位。但係周大福呢類金行兼零售股,尤其係香江本地零售股,已經唔係孖屐嘅焦點所在
好耐,只係間唔中炒通關會記起,所以周大福喺今次季檢後染藍就最出奇。
不過睇返數據又好似唔係咁出奇;周大福市值都成1640億銀左右,以現有藍戰士入面都
排大概中間位置,更加係同板塊入面排頭位,比起第二位嘅六福(00590)都大十幾倍;另
外,日均成交額都有4000萬銀上下,睇落又唔係真係咁冷。對於周大福染藍,孖屐第一時間
諗到通關概念,觀乎目前恒指叫有通關概念嘅都係地產品佬、領展(00823)呢類,比起周
大福的確無咁直接,而周大福可以話係直接受通關與否左右,所以周大福染藍之後,正正可以成
為通關概念嘅熱度指標。
所以近來季檢揀卒,都好大程度同熱炒概念有關,如果要估下次染藍新貴,跟概念嚟tip
就會有啲眉目,當然市值同成交量都要睇。如果跟呢個標準,蔚來(09866)、理想
(02015)同樣市值高、成交大,又係最熱炒嘅新能源車板塊,點解又無份呢?呢層可能同
佢哋係中概股有關啦,呢個時勢中概股都危危乎,所以同樣大市值嘅百勝中國(09987)都
無得染藍。不過呢三隻入面,理想係雙重主要上市,美股退市風險細啲,唔知會唔會有較大機會
染藍呢?請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無涉。
etnet榮獲HKEX Awards 2023 「最佳表現證券數據供應商」大獎► 了解詳情