按盤價 
《魚缸博客》尋晚（１９日）聯儲局主席鮑威爾講嘢，有人認為偏鷹，亦有人認為偏鴿，點
睇唔重要，點落注最實際。利率期貨反映，投資者預期１１月份唔加息機會率高達９９﹒５％。
不過，鮑公又冇話唔會再加息，總之一切基於數據表現啦！
尋晚美股三大指數又跌過，今朝恒指都裂口低開１６８點或跌１％，報１７１２７，暫時亦
係全日低位，加上下星期一（２３日）係公眾假期，斷估今日逐步收復失地，最終倒升收市。
尋日隻舜宇光學（０２３８２）走勢凌厲，股價輕微低開後持續攀升，午後一度高見
６６﹒４５銀，最大升幅接近１１％，技術上營造第二個上升旗形，所以今日調整極之正常。
舜宇升勢如此強勁，相信同中國商務部長王文濤１８號喺北京會見蘋果行政總裁庫克有關，
佢話中國將會堅定推進高水平開放、持續擴大市場准入，致力於營造市場化、法治化、國際化嘅
營商環境。歡迎包括蘋果公司在內嘅跨國公司共享中國市場紅利，實現共贏發展。
舜宇係ｉＰｈｏｎｅ手機鏡頭供應商之一，根據舜宇公布嘅９月份數據，手機鏡頭出貨量按
年大增１６﹒９％至超過１﹒１１億件，而手機攝像模組出貨量亦按年大增４１﹒４％至
５２２３﹒８萬件，不過舜宇解釋係因為舊年同期整體智能手機市場需求疲弱，令基數處於低位
。
摩根士丹利喺１０月１２日發表研究報告指，舜宇嘅手機鏡頭同攝像模組喺９月份按年增長
穩定，車載鏡頭就因為高基數效應，令增長有所放緩。該行又話，考慮到手機攝像模組舊年下半
年嘅低基數，所以維持今年下半年按年持續增長觀點，俾舜宇目標價９０銀，今年底每股盈利
１﹒３１銀，未來兩年就分別係２﹒３５同３﹒１４銀，市盈率就預期由今年嘅４７﹒１倍，降
到明年嘅３０﹒４同２０２５年嘅１９﹒７倍，評級跑贏大市。
博客建議喺６２﹒６５銀買入，目標７４銀，突破就望升多１０銀，即係８４銀，假設
５０﹒３銀確認見底，咁舜宇長線變番紅底股（１００銀）只係時間問題。（ｐｃ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
