行業新聞

16/05/2022 16:38

《小傳日記》經濟數據唔靚仔,阿爺即刻諗諗計,碧桂園要睇!

  《小傳日記》魚缸今朝開局都唔錯,高開兩百幾點,都係多得噚日上海宣布嚟緊會分階段解
封,另外人行就宣布根據現時嘅LPR,下調對首間住房貸款利率下限20基點,由4﹒6巴仙
下調至4﹒4巴仙,所以今朝開市零售佬同內房佬都飲勝慶祝。不過A場似乎就唔高興,全日都
頭耷耷掃曬興,搞到魚缸都無癮,回跌返落嚟之後都係浮浮沉沉,最終收場報19950,升
51點。
  原來因為神州今日公布嘅經濟數據麻麻,4月社會消費品零售總額按年跌11﹒1巴仙,係
2020年3月以來最低;4月規模以上工業增加值按年跌2﹒9巴仙,都係2020年2月以
來最低;頭4個月全國固定資產投資按年增長6﹒8巴仙,係年內最低水平。不過跌市還跌市,
雖然社會消費品零售按年要跌,不過今日上海解封消息同時出台,孖屐都係focus喺將來居
多,解封當然係有利零售啦,所以今日啤酒佬同體育佬都跌唔落;潤啤(00291)跌少過1
巴仙,報44﹒4銀;百威亞太(01876)升少過1巴仙,報19﹒64銀;安踏
(02020)升多過1巴仙,報86﹒05銀;李寧(02331)升少過1巴仙,報
57﹒25銀。
  喺晏晝,阿爺想再cheer up吓個市,於是就公布將民企嘅碧桂園(2007)、龍
湖(00960)同美的(03990)列為示範企業,將會喺今個禮拜率先發行人仔債券。
  今日阿爺嘅舉措又再次證明要有序放水嘅方向,好似只係降首置息口而唔係等過兩日先一次
過降LPR,都係反映阿爺「房住不炒」嘅宗旨。另外又只係畀碧桂園、龍湖呢啲阿爺揀過嘅民
企先可以恢復發債,都係唔想俾內房債問題一波未平一波又起。而今日碧桂園收升多過一成,主
動買沽比率58比42,大戶主動買沽更加係64比36,睇嚟「孖屐」都好睇好阿爺呢個祝福
,而家嘅阻力位似乎就喺5﹒5銀,即係五十天線附近,如果過得到就神仙喇,請請!

  《編者按》本欄搜羅即日熱門傳聞,惟消息未經證實,《經濟通》亦不保證內容之準確性。
本文只供參考之用,並不構成要約、招攬或邀請、誘使、任何不論種類或形式之申述或訂立任何
建議及推薦,讀者務請運用個人獨立思考能力自行作出投資決定,如因相關建議招致損失,概與
《經濟通》、編者及作者無涉。

【讀者專享早鳥優惠】火速訂購etnet 28周年呈獻《線條下的香港.沈平鋼筆畫作》! ► 立即行動

【會員專享早鳥優惠】火速訂購etnet 28周年呈獻《線條下的香港.沈平鋼筆畫作》!

《線條下的香港.沈平鋼筆畫作》 期間限定展覽

【訂閱有賞】賞《線條下的香港.沈平鋼筆畫作》連親筆簽名