按盤價 
《小傳日記》人稱「沈大師」嘅著名股評人沈振盈近排就宣布退休，一講完「恒指見四萬」
恒指就見咗萬四水平，令人懷疑沈大師係咪終於抵受唔住壓力。不過佢回應該行家訪問嗰時就表
示，自己都年屆花甲，做券商壓力大，要減輕吓負擔，所以今日起就辭去訊匯ＣＥＯ個位。不過
佢就強調「手停口唔停」，「財經ＫＯＬ」一定繼續做，股照講台照上，所以大家之後反而仲有
機會多咗見到大師！
大師「燈力」無邊，多年來嘅「加持」堪比魚缸嘅反向ＥＴＦ，單係今個１月就已經見到大
師嘅威力。月初以來，原本以為遊戲監管收返手之後氣氛會回暖返啲，點知外資大手掟貨，Ａ股
Ｈ股齊齊跌，逼到阿爺「手口並用」，一邊派「國家隊」接貨，一邊放口風想搞「限沽令」。不
過期間大師就點評，話魚缸衰唔曬，一定可以「突破４００００點」，結果就引起股壇一番討論
，有批評大師過份樂觀嘅，又有跪求大師唔好再燈嘅。不過外資之後繼續狂沽Ａ股，上證綜指仲
試過２７００都穿埋，魚缸呢邊先穿１６０００，一個禮拜時間再穿埋１５０００見過萬四字頭
，名乎其實「未見四萬先見萬四」！
唔知係咪阿爺都知大師燈力唔係講笑，臨近月尾終於再出「救市組合拳」，先有突發預告降
準０﹒５百分點，消息喺Ａ股收市後但港股未收市時公布，恒指幾分鐘內急飆２００點。再之後
幾日就接連有廣州、蘇州取消限購令，逐步加推措施，令到魚缸難得地見到「三連升」。
不過魚缸一過１６０００就明顯唔夠力要調頭向下，消息上美國一步入大選年就動作多，呢
頭話聯想（００９９２）電腦會竊取國家機密，嗰頭又話唔畀幫襯藥明（０２２６９），最新連
電動車都話會危害美國安全，實行全方位多行業咁打壓中國，令到魚缸今個月都係１６０００不
保。
未來一個月開始，魚缸就會少咗沈大師嘅操盤，唔知魚缸有無機會藉此逃過一劫呢？不過大
師燈力並唔止落手，可能單用把口都已經發揮到作用，希望唔落手就可以燈力減弱啦，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
etnet榮獲HKEX Awards 2023 「最佳表現證券數據供應商」大獎► 了解詳情
