上星期魚缸勢頭勁好，不過隨住神州黃金周過去，星期一（９日）魚缸表現好一般，好彩到噚日（１０日）又喺大象（００００５）帶領下回升，暫時魚缸都係升股未升市，阿臣相信魚缸短期內都會係適度調整嘅格局，大漲小回實屬牛市嘅普遍現象。
特首林鄭今日十一點宣讀佢上任後第一份施政報告，大家都關注土地政策，觀望政府會唔會透過公私營合作改劃農地興建「首置」上車盤。一眾大行都唱好本地地產股，預期地產商可受惠農地加快置換興建住宅，將土地價值釋放。不過，特首話「首置」詳情有待公布，阿臣就唔認為自己有機會受惠於「首置」上車盤，都係繼續儲下子彈先算。
＊閱文市值可達９００億，去年方虧轉盈＊
阿臣見到ＱＱ（００７００）旗下嘅閱文分拆出嚟，有傳今個星期會進行上市聆訊，１０月１７日收市前買入或持有ＱＱ嘅股東，可以獲得優先發售中嘅保證配額。孖屐早前預計，閱文上市後市值介乎６７０億至９００億銀。呢間公司，過往三年業績，頭兩年都蝕錢，係最近一年先至錄得３０３６萬人仔嘅盈利。好在閱文近三年嘅收入卻係上升緊，上年收入就增長咗近六成，錄得近２６億銀人仔。不過，成本方面就做得唔好，上年嘅成本都相應增加咗近五成，有待改善。
閱文集團勁就勁在佢係神州最大嘅網上出版商，市佔率最大。閱文集團收入主要分為兩部分，最主要係「電子付費」嘅部分，佔公司收入約九成，並且正在繼續高速發展。公司另一部分係版權收入，佔餘下的一成左右。而隨住內地電影業電視劇業發展，一Ｄ好劇本就有價有市，好似《琅琊榜》、《鬼吹燈》、《盜墓筆記》、《步步驚心》呢Ｄ劇集，當初就係屬於閱文。不過，阿臣認為，版權收入嘅增速，遠遠唔夠ＱＱ本身手遊業務、廣告業務、支付業務嘅增長來得快。話雖如此，唔排除大戶都會買入閱文作持倉，所以喺１０月１７日或之前，唔少大戶都應該會買入ＱＱ以便得到閱文嘅招股配額。
＊長揸ＱＱ，短炒中海物業＊
鑑於ＱＱ嘅基本面實在太好，公司手遊業務增長勁，同時又有新嘅盈利增長點，好似公司嘅大數據、支付業務，都係新嘅增長焦點，以ＱＱ巨大嘅潛在增長空間，阿臣覺得現價都仲係抵買。不過，科技嘅效益係要長嘅時間先體現到出嚟，所以阿臣決定就喺３５０蚊買一手ＱＱ一直揸落去。除非ＱＱ突然唔做老本行，否則阿臣都唔沽出了。然後阿臣就用餘下嘅錢，喺１﹒９５銀買一手中海物業（０２６６９）短炒下，跌穿１﹒９銀先考慮止蝕離場，希望可以賺到少少快錢啦！
表列截至１０月１１日止（１１：３０ａｍ）投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
越地 ２００００股 １﹒５４元 １﹒５９元 ３１８００元
民銀資本 ２００００股 ０﹒６４元 ０﹒６３元 １２６００元
騰訊 １００股 ３５０﹒００元 ３５０﹒８０元 ３５０８０元
中海物業 ５０００股 １﹒９５元 １﹒９４元 ９７００元
美股：
Ｔｅｓｌａ ２股 ３１６美元 ３５５﹒５９美元 ７１１﹒１８美元
＃（約５５５０港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８０４０計算
股票市值 ： ９４７３０元
剩餘現金 ： ３５８３元
組合淨值 ： ９８３１３元
組合本月收益表現：－ ０﹒７％（截至上月底止組合淨值：９８９９６元）
組合累計收益表現：＋３１﹒１％（本金７５０００元計）（２０１６年８月開倉）
＊數據截至今日１１：３０ａｍ
【與拍賣官看藝術】常玉作品屢創天價，背後其實藏著跌宕起伏的人生► 即睇
