雖然香江實施咗《禁蒙面法》去限制示威活動，但實行至今已經第五日，衝突同暴力事件仲未見有停止跡象。另一邊廂，花旗國同神州聽日（１０日）又就貿易議題再度談判，而「孖屐」一早預咗佢哋唔會傾得掂，所以魚缸都係ｋｅｅｐ住窄幅上落。
喺咁嘅市況底下，缸友們想保住自己荷包，都會選擇Ｄ防守性較高嘅板塊，好似逆向ＥＴＦ同內需股咁，而物管股喺市況唔太好嘅情況下都會有資金湧入避險，所以阿臣今次就嚟講吓，呢幾年內房股好興分拆出嚟上市嘅物管股！
＊碧桂園服務增長潛力靠呀媽？＊
由於近幾年神州國民有錢咗，對自己生活質素要求都高咗，因而令到物業管理行業開始興起，變成魚缸其中一個熱門板塊！物管股之一嘅龍頭就非碧桂園服務（０６０９８）莫屬啦，睇佢嗰名就知佢背後有呀媽－碧桂園（０２００７）撐住。睇佢嘅股價更係由上年開始到依家都仲升緊，表現相當突出。要睇一個物管股賺唔賺到錢，首先，就要睇佢有幾多收費管理面積，因為愈多面積，佢嘅管理費就可以收得愈多！而碧桂園服務上半年實現合同管理面積有成５﹒８億平方米，足足多過另一隻大佬雅生活服務（０３３１９）成２﹒６億平方米！
其次，呀媽碧桂園本身嘅銷售業績對碧桂園服務嚟講都相當重要！因為呀仔上半年物業管理有近七成七嘅物業都係嚟自碧桂園，所以睇返碧桂園業績，今年頭９個月嘅合同銷售金額共約４２２９﹒３億元人仔，差７８９﹒５億人仔就同上年年度金額一樣！如果以佢啱啱９月合同銷售金額約５１５﹒８億人仔去估計之後剩低３個月嘅平均銷售，如無意外今年更加會超過上年嘅合同銷售金額。因此，阿臣估碧桂園下半年表現都唔會太差，順便帶挈埋佢呀仔都ｋｅｅｐ住有得升。
不過，凡事都有風險，由於碧桂園服務有約七成七面積都依賴咗呀媽嘅物業，所以如果未來呀媽賣唔出Ｄ樓，佢收費管理面積增長都會大大縮水，升值潛力亦都變弱。另外，隨住碧桂園服務今年以來都升咗唔少，依家嘅市盈率係全部物管股之最，去到差唔多成５９倍，阿臣就覺得又未必要喺依嗰時勢去買佢嘅，可以揀返ｄ估值較為落後嘅街坊。
＊彩生活估值低殘，可現價低吸＊
喺同行嚟講，阿臣就比較睇好Ｄ中型嘅物管股，就好似彩生活（０１７７８）咁，除咗市盈率只喺９﹒４倍左右，佢喺上半年集團合約管理嘅總建築面積都唔少，有成５﹒６億平方米！除咗集團合約管理、計埋同佢合作嘅，同埋同盟協議項下嘅平台服務總建築面積有成１２億平方米。雖然彩生活上半年業績唔算標青，只係多賺兩成三，總收入更只係增長３巴仙；而佢呀媽花樣年（０１７７７）今年９月嘅物業銷售額就增長咗近兩成半，銷量唔夠其他同行勁，但物管股長遠嚟講都仲會有增長，可以趁彩生活依家低位現價吸納！
＊阿臣沽３６１度，部署買黃金＊
睇返阿臣嗰倉，雖然阿臣之前睇好３６１度（０１３６１）短期或可升到一年前高位２﹒１１銀，但由於黃金周都已經完咗，而且睇返依家嗰技術圖，ＭＡＣＤ牛差距開始進一步收窄。阿臣想拎返Ｄ現金去買第二隻股，所以噚日（８日）就以１﹒８銀沽貨，不計手續費，可以賺１０００銀。
另外，早前阿臣講過議息之後要部署Ｄ黃金，見依家金價都回落返，之後中美貿易戰又唔知傾成點，所以諗住買Ｄ金避險。阿臣就睇中咗ＳＰＤＲ金ＥＴＦ（０２８４０），如果佢喺今個星期跌穿１１００銀，就可以買定一手先！
表列截至１０月９日（１１：１５ａｍ止）阿臣投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ２０００股 ９﹒６５元 １３﹒３４元 ２６６８０元
煤氣 １０００股 １６﹒００元 １５﹒０４元 １５０４０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ４１７２０元
剩餘現金 ： １２０８５８元
組合淨值 ： １６２５７８元
組合本月收益表現： ＋１﹒５％（截至上月底止組合淨值：１６０１０５元）
組合累計收益表現： ＋５４﹒８％（本金１０５０００元計）（２０１６年８月開倉）
＊數據截至今日１１：１５ａｍ
樂本健【秋日開倉26 - 27/9】保健品低至$20！► 火速行動
