古臣屋企樓下有幾間找換店，平時都會直行直過唔多望幾眼，直至最近，我終於畀上面鮮紅嘅數字震撼到：買入價０﹒８９７，意思即係每１００蚊港紙，竟然可以換到
８９﹒８蚊人仔。如今港紙兌人仔就快到９算，波真係圓嘅！
人民幣跌得咁快，唔怪得中國政府要設限，阻住１３億人民嚟香港「假投保，真走資」喇。今次銀聯進一步限制內地客仔用銀聯卡交保費，各大保險公司仲有咩奇招吸客，真係要拭目以待。
＊各大保險商財路受阻，經紀仔好灰心＊
提到保險，畢業後做咗上班族幾個月嘅我同你，都總會遇到幾個保險佬。古臣溫馨提示，假如你身邊嘅同學莊友師兄或者親戚，ＦＢ主頁突然正能量爆燈、又鍾意送下禮券戲飛，仲會無喇喇打招呼約你食飯，唔需要懷疑，佢八九不離十，係一個「貨真價實」嘅保險經紀。
今次保險界突然畀阿爺暗算，阿臣一收到風，就即刻問候下做咗保險經紀一年嘅朋友，好在佢只係得本地客，影響唔大，不過同時佢又好失望，為咗北上拉客仔，佢一直積極發展內地關係網，結果卻係一場空。
本地保險股藍籌友邦（０１２９９）相信最受打擊，而保誠（０２３７８）由於股票成交疏落，關注度比較低。睇番財經界對友邦嘅評點，離不開「新業務價值」呢幾隻字，亦即係可以簽到幾多張新保單，當時內地大客為咗幫資產保值，幾百萬蚊嘅大單話開就開，可想而知呢個消息對友邦嘅負面影響係持續性嘅，不過具體威力就要等業績公布咗先知。
＊超人睇準時機完美離場，古臣掹衫尾＊
中國政策五時花六時變，隨時一個屈尾十，打你個措手不及。不過李超人就唔同喇，早人一步剝離中國資產，仲要趁住樓價發癲，賣走上海嘅地標廣場，仲有傳話要賣埋香港中環中心添，ｔｉｍｉｎｇ捉得啱啱好。
阿臣亦掹住超人嘅衫尾，小賺咗一把，事關揸住嘅電能（００００６）一度快將到達目標價
７５蚊，可惜嘅係愛股騰訊（００７００）連日潛水，距離當時買入價水位已經相差無幾，好在就快公布業績，安慰自己今次嘅跌浪只係技術性調整啫！
另外，阿臣月底出咗糧，嗱嗱聲為古臣基金入多５０００蚊，補充子彈再戰明天。
表列截至１１月２日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
騰訊 １００股 ２０３﹒４０元 ２０４﹒８０元 ２０４８０元
電能 ５００股 ７１﹒９０元 ７３﹒８０元 ３６９００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：５７３８０元
剩餘現金 ： ３５７５元
額外注資 ： ５０００元
組合淨值 ：６５９５５元
組合本周收益表現：－０﹒９０％
組合本月收益表現：＋０﹒５４％（截至１０月底止組合淨值：６０６３０元）
組合累計收益表現：＋１﹒４７％（本金６５０００元）
＊數據截至今日中午收市
【你點睇】的士記分制將於周末生效，你認為該制度可否幫助的士提升服務質素？► 立即投票
