今日係美國總統大選揭盅嘅日子，阿臣一直坐喺ｏｆｆｉｃｅ做嘢，都不忘關注選舉最新走勢，直到我寫完呢篇文為止，特朗普仍然意外領先，真係嚇到我無咗半條命，真心害怕脫歐戲碼重演！
雖然好多人都認為今次兩黨都派出令人失望嘅人選，不過古臣認為，一個言行圓滑長袖善舞嘅老油條政客當選總統，點都好過一個違背美國核心價值嘅「偉人」。
＊特朗普動搖美國價值，好在有三權分立＊
阿臣一直認為，今次選舉將會成為美國核心價值之爭。
例如美國係一個敢於全球發揮影響力嘅國度，某程度上算係其立國之本，一直介入中東政局，爭議聲從來不絕於耳，鍾意嘅就話佢係文明燈塔，討厭嘅就話佢係世界警察。不過，當我哋睇到中東國家政權不斷保守化，甚至產生伊斯蘭國呢種極端組織，單靠雞蛋嘅奮鬥，係咪可以鑿破高牆？面對呢個危險重重嘅地球村，特朗普決定各家自掃門前雪，會唔會又係一個好主意？
但係我哋又唔需要對特朗普太悲觀，即使佢當選，都有司法系統規限佢，假如有一個要求州份獨立嘅人士當選聯邦議員，特朗普就算用盡洪荒之力，相信都無辦法阻止對方走馬上任，畢竟美國係個三權分立嘅國家，特朗普無權力釋法，而州份獨立從來都係可以討論嘅話題。
＊外圍政局震盪嚇怕古臣，本周靜靜等候＊
由於美國大選原因，股市風雲變幻，古臣今個星期無任何行動，睇定啲再講，不過眼見騰訊（００７００）一度跌穿２００蚊，有啲心碎，惟有「不要問，只要信」，堅持自己嘅判斷。至於電能（００００６）股價原本一步一步拾級而上，就快到７５銀位置，結果今朝震一震又打回原形，惟有再畀啲耐性等等。
表列截至１１月９日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
騰訊 １００股 ２０３﹒４０元 ２００﹒００元 ２００００元
電能 ５００股 ７１﹒９０元 ７３﹒３０元 ３６６５０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：５６６５０元
剩餘現金 ： ８５７５元
組合淨值 ：６５２２５元
組合本周收益表現：－１﹒１２％
組合本月收益表現：－０﹒６７％（截至１０月底止組合淨值：６０６３０元）
組合累計收益表現：＋０﹒３５％（本金６５０００元）
＊數據截至今早１１：３０ａｍ
【與拍賣官看藝術】常玉作品屢創天價，背後其實藏著跌宕起伏的人生► 即睇
