話說阿臣賣走ＱＱ（００７００）之後，點都有些少唔甘心，心底始終覺得
ＱＱ值２００蚊樓上，甚至係去到新巔峰位置，不過當時買入兩隻重磅藍籌，砸住所有現金，股價又無咩進展，放手之後反而一身輕。
上禮拜五（２５日），阿臣有得早放工，心情靚爆準備Ｈａｐｐｙ Ｆｒｉｄａｙ嘅時候，手機突然彈出通知，話深港通喺１２月５日正式開通。咦，莫非係一個啟示，畀機會阿臣收復失地呢？
＊深港通歡迎細股，前方有妖氣請小心＊
古臣趁通車前做少少功課，深港通同滬港通原理一樣，港股同深圳Ａ股投資者可以投資對方市場嘅部分股份，每日設有固定嘅限額，不過滬港通嘅經驗話畀大家聽，通常都用唔晒。
兩者最大嘅分別在於，喺上海上市嘅公司比較大舊，仲有唔少國企進駐，業務偏向基建、製藥、工業等等嘅傳統經濟股，而深圳上市嘅公司，大多數都係新銳嘅互聯網股、手機零件股等等，所以相應地，今次深港通接受北水買入嘅股份，除咗大隻佬、中型股、深ＡＨ股之外，仲可以買入市值５０億銀嘅恒生綜合小型股指數成分股添。
經古臣觀察，發現深Ａ股其實妖氣頗濃，單計可以買入嘅８８１隻股份，唔少主打新經濟概念，究竟裡面有幾多係濫竽充數嘅怪股呢？而且由於上面市場比較封閉，平均市盈率有３４倍，相對香港唔少死魚彈嘅豆釘股，估值真係偏高，除咗ｆｕｎｄ佬之外又有幾多小股民會北上玩呢？
＊中美齊齊撐基建，中交建落後即買入＊
古臣禮拜一趁工作空檔望下個市，發現深港通最相關嘅股份，包括港交所（００３８８）表現都唔係好好，睇落個勢唔掂，不如搵Ｄ隨市炒起嘅股份操作算喇。同股痴朋友討論過，佢話近期侵侵上台帶動基建概念，中國一帶一路都跟住炒起，基建鐵路股諗得過。
咁揀邊一隻好呢？中鐵建（０１１８６）下星期加入國指成分股，理應係利好信號，不過股價創一年新高後跌返轉頭，似乎高處不勝寒。中車（０１７６６）升得太急，突破埋２５０天線（７﹒４４蚊），高追唔抵。反而中交建（０１８００）表現相較同業仍然有些少落後，見到價位去到９﹒２５蚊，即刻買入一手部署，暫時目標唔好太激進，先試１０蚊。
表列截至１１月３０日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
電能 ５００股 ７１﹒９０元 ７３﹒２０元 ３６６００元
中交建 １０００股 ９﹒２５元 ９﹒２５元 ９２５０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：４５８５０元
剩餘現金 ：１８７４８元
組合淨值 ：６４５９８元（本月曾注資５０００元）
組合本周收益表現：－０﹒３７％
組合本月收益表現：－１﹒５７％（截至１０月底止組合淨值：６０６３０元）
組合累計收益表現：－０﹒６２％（本金６５０００元）
＊數據截至今日中午收市
【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票
