今個星期美國又議息，其實大家晨早已經預咗會加，而香港本地銀行又未必會跟，影響應該有限。阿臣臨近年尾有個ｐｒｏｊｅｃｔ要趕工，見到個市冇咩特別，兩隻股－－電能（００００６）、中交建（０１８００）亦唔多生性，更加冇心情理咁多。不過，幾忙都好，總有啲花生唔食唔得。
＊特首選戰開鑼，流言四起信不信由你＊
特首選戰開跑冇耐已經高潮迭起，上星期初薯片叔叔（曾俊華）先喺立法會踩中（疑似）蕉皮，過冇幾日梁振英就宣布因為家庭理由（信不信由你）唔會爭取連任下屆行政長官，相信唔少港人同阿臣一樣大跌眼鏡。正當葉劉話聽到ＣＹ唔尋求連任消息好「感動」，大家以為佢係
Ｐｌａｎ Ｂ之際，林鄭又放聲氣指會重新考慮參唔參選，就連佢個老公、兒子都由生活得好好嘅英國突然返去中國打工！同為司長嘅薯片叔叔亦惟有急急腳搶先喺前日辭職。
至於坊間亦流言四起，大台話阿爺向薯片叔叔「亮紅燈」，轉頭有報章指林鄭、葉劉、雙曾都唔係「真命天子」，實在唔知信邊樣好。或者惟一可以肯定嘅係，你同我手中根本一票都冇，拳來腳往嘅劇情就只能當成茶餘飯後嘅話題。
＊換人減辣招？地產股炒風一閃即逝＊
梁特棄選當日，唔少「ＡＢＣ」朋友都話要慶祝。其實，有咗咁多屆嘅經驗，阿臣都係勸大家唔好抱太大期望，咪以為換人唔換制度就可以改變香港。好似樓市咁，辣招根本係由有商界支持嘅薯片叔叔任內推出嘅，上台會唔會即刻打倒昨日的我、推倒重來？林鄭就更加講到明想延續梁特嘅政策！始終居住環境係唔少香港人嘅問題，邊個執掌大權都唔會敢亂鬆綁，你見地產股炒風半日即完都明白啦。不過，對阿臣我依個只能奢望上樓嘅９０後嚟講，有冇辣招似乎都唔關我事…
表列截至１２月１４日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
電能 ５００股 ７１﹒９０元 ７１﹒２０元 ３５６００元
中交建 １０００股 ９﹒２５元 ８﹒９６元 ８９６０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：４４５６０元
剩餘現金 ：１８７４８元
組合淨值 ：６３３０８元
組合本周收益表現：－０﹒９％
組合本月收益表現：－２﹒７％（截至１１月底止組合淨值：６５０４８元）
組合累計收益表現：－２﹒６％（本金６５０００元）
＊數據截至今日中午收市
全新節目《說說心理話》青少年不可以戀愛！？真實個案講述驚心動魄經歷► 即睇
