特首選戰踏入新一頁，薯片叔叔曾俊華望穿秋水等足一個月，終於等埋奶媽林鄭星期一（１６日）一齊獲阿爺批准辭職。建制派出盡吃奶力唱好林鄭，似乎下屆會出一個「真命天女」，不過林鄭擺明車馬係ＣＹ ２﹒０，故宮單嘢再發酵隨時會激起「ＡＢＣ」嘅反抗，加上習大大又冇出過聲，奉勸各位唔好跟車太貼。
阿臣忽發奇想，如果薯片叔叔暗中得到阿爺祝福，加埋財金界選票，泛民又以為揀個「冇咁爛嘅橙」，薯片叔叔咪史無前例集合建制、泛民支持於一身，當選之後可以挾高民望、高認受性推行政策。屆時薯片叔叔一個屈尾十搞廿三條，泛民卻已經落咗搭。冇可能？「咁易畀你估到，就唔係阿爺啦」！
＊電能會傾派特息，趁機沽貨輕身再上路＊
薯片叔叔等到頸都長終於辭到職，阿臣一樣靜待股票翻身之日。就係同一日，電能
（００００６）公布星期四（２６日）會開董事會傾派特別中期息５蚊。超人誠哥亦有大動作，旗下三寶長實（０１１１３）、長建（０１０３８）同電能組成財團，收購澳洲能源資產。
電能難得有好消息，周一即日最多跳起近４％，阿臣見機不可失，速速喺７３﹒１銀放咗電能，賺返４１０銀算數。阿臣唔係唔明白電能依啲公用股應該作長線投資，不過一半古臣基金砸死咗又點發圍呢？加上當日有傳話英國首相文翠珊會提出「硬脫歐」，都幾擔心英鎊再貶值，電能會再次潛水，倒不如見好就收、減貨輕身再上路。
表列截至１月１８日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
中交建 １０００股 ９﹒２５元 ９﹒３１元 ９３１０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ９３１０元
剩餘現金 ：５６００９元
組合淨值 ：６５３１９元
組合本周收益表現：＋２﹒０％（６４０４４）
組合本月收益表現：＋５﹒６％（截至去年底止組合淨值：６１８４３元）
組合累計收益表現：＋０﹒５％（本金６５０００元）
＊數據截至今日１１：３０ａｍ
etnet榮獲HKEX Awards 2023 「最佳表現證券數據供應商」大獎► 了解詳情
