上星期三（１５日）魚缸嚟個升得幾好，單日飛起２９１點，當日最多飛起
３６４點，嚟到今日（２２日）上午魚缸好彩都守得住兩萬四關口，不過估計由於上年９月份
２４３００點左右嘅蟹貨太多，魚缸嚟到呢個位可能要收一收油。
＊一門三傑，安保潛龍再飛天＊
今個星期一（２０日）有隻安保工程（０１６２７）掛牌，由於係盈信（０００１５）分拆出嚟嘅新股，古臣未買過分拆上市嘅股所以唔敢抽，但古臣嗰位讀Ｌａｗ嘅師兄Ｐｈｉｌｉｐ就抽咗。可惜首日掛牌安保就潛晒水，首日收市低招股價近一成。古臣仲以為Ｐｈｉｌｉｐ哥呢次滑鐵盧，點知佢一直揸住，到星期二（２１日）安保浮返上水面，仲一度高見１﹒４１銀，比招股價１﹒１高出２８巴仙，Ｐｈｉｌｉｐ哥唔使蝕反而有賺，實在藝高人膽大！
問Ｐｈｉｌｉｐ哥點解咁有信心揸新股揸多日，佢話佢都係參考盈信往績而為之。話說盈信係搞分拆上市嘅高手，安保係盈信近年分拆出嚟嘅第三間公司，而之前兩間已經易手，分別係金誠（０１４６２）同前稱怡益嘅比速科技（０１３７２）。此兩者以往炒賣殼，升幅以倍計。既然盈信擅長此道，Ｐｈｉｌｉｐ就更有信心安保掛牌初期表現唔會差去邊，點都博一博。
咁究竟安保將來會唔會賣殼？Ｐｈｉｌｉｐ對古臣報以淡淡嘅一笑：「唔知喎！新上市公司股東有禁售期嘛，邊有咁快賣得吖，我只係見佢個價升到咁高，趁機離場唔賺到盡咋！」
＊觀察中交建，睇位ｔａｋｅ ｐｒｏｆｉｔ＊
前特首曾蔭權就係唔識得收手，結果貪字得個貧，所以唔好賺到盡，都係古臣嘅另一投資原則。睇返近來大市雖然好有力，古臣亦唔怕繼續去持貨，不過魚缸要再爆上兩萬五，又似乎有啲難度。家陣持有嘅中交建（０１８００），上星期三爆上１０﹒７６銀後回軟。遲吓如果中交建再試破呢個高位不果，古臣就只好換馬啦。至於金隅（０２００９）就睇吓破唔破到２０１５年８月１１日最高位３﹒７３銀，如果得，古臣就繼續持有，否則如股價調頭跌穿３﹒２銀，古臣就會該位置離場。始終踏入３月會係點，古臣才疏學淺，都係未睇得透，穩陣起計就惟有睇位
ｔａｋｅ ｐｒｏｆｉｔ啦！有食唔食，罪大惡極吖嘛！
表列截至２月２２日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
中交建 ２０００股 ９﹒５２５元 １０﹒２８元 ２０５６０元
金隅 １００００股 ３﹒０２０元 ３﹒６０元 ３６０００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：５６５６０元
剩餘現金 ：１５８５４元
組合淨值 ：７２４１４元
組合本周收益表現：＋ ３﹒２％
組合本月收益表現：＋１０﹒７％（截至上月底止組合淨值：６５４１９元）
組合累計收益表現：＋１１﹒４％（本金６５０００元）
＊數據截至今日１１：３０ａｍ
【你點睇】本港主要銀行跟隨美聯儲減息，你對樓市前景有否信心？► 立即投票
