新股美高域（０１９８５）噚日（６日）輝立暗盤高開報１﹒７銀，比招股價１﹒４５銀高出１６巴仙。隻股超購近１１７７倍，不過一手中簽率得五成。公司集資淨額預計約５９２０萬銀，都唔算太多，不過股價今日就開報３﹒８９銀，比招股價高出１﹒７倍，抽中咗嘅朋友就和味啦！
＊打好藍天保衛戰，捍衛神州一片青空＊
全國人大會議星期日（５日）開幕，總理李克強喺工作報告度提到，要打好藍天保衛戰。古臣幾年前喺神州大陸，偶然都可以見到半片藍天。依家返大陸，一片赤紅嘅滾滾沙塵籠罩住整片青空，總理嘅擔心不無道理。最近香江都被濃霧侵擾，古臣都擔心某一天香江都會被呢片赤紅風暴慢慢侵蝕，最後青天白雲就盪然無存啦！所以真係唔明白，香江政府點解唔配合下國策，繼續支持一下新能源車補貼，為香江打造清新嘅天空。阿爺要人話嘛：「邊個唔聽話就滾出去！」香江畀阿爺趕出去就唔好啦，滾咗出去阿爺懷抱，香江邊生存到呢？
＊磚頭價格見新高，樓市有機會見頂？＊
最近股市回落，但係樓市就繼續攀升，二手樓價升得離譜，報紙話４００萬內私樓唔夠一千伙。古臣又擔心起上車嘅問題。林一鳴喺ｆａｃｅｂｏｏｋ曾經有篇帖文就直言，樓市已處「牛市三期」階段，又話「樓價自２００９年至今累漲逾７年，調整來臨實屬正常，預期『牛三』今年會完結，樓市有機會今年見頂。」聽到咁講，古臣個心又定啲。
古臣手上無磚頭，唔使奢望喺樓市度食胡啦，不過回望股市，暫時又唔似牛三。而唔少大股好似大象（００００５）、ＱＱ（００７００）又已經從低位回升唔少，所以亦唔似牛一。古臣認為股市仍處於牛二，牛二嚟講，上升動力來自基本因素。難怪車股、水泥、內房呢啲中型至大型股成為大市上升主力，現階段績優股係最好玩。「咁第日牛三咪輪到細價股？」我咁問師兄
Ｐｈｉｌｉｐ。「錯！牛三係咩股都升，只不過，細價股升得最勁咁解啫。」Ｐｈｉｌｉｐ閃爍住異樣嘅眼光。換言之，香江個股市咪仲有排先到牛三？睇嚟仲可以成為古臣賺錢嘅樂土。
表列截至３月８日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
金隅 １００００股 ３﹒０２元 ３﹒５７元 ３５７００元
匯控 ４００股 ６３﹒００元 ６３﹒３５元 ２５３４０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：６１０４０元
剩餘現金 ：１０６４８元
組合淨值 ：７１６８８元
組合本周收益表現：－ ０﹒２％
組合本月收益表現：－ ０﹒７％（截至上月底止組合淨值：７２１９４元）
組合累計收益表現：＋１０﹒３％（本金６５０００元）
＊數據截至今日１１：３０ａｍ
【你點睇】本港主要銀行跟隨美聯儲減息，你對樓市前景有否信心？► 立即投票
