雖然古臣沽咗中交建（０１８００）後，隻股就一路咁升，不過古臣都無後悔，事關星期一（１３日）魚缸喺中資股推動之下大升，而古臣手上都仲有一隻中資嘅金隅
（０２００９），依家最關鍵都係睇吓金隅破唔破到２月２３日嗰個３﹒８５銀嘅高位，加油呀金仔！
＊加息機率百分百，「息魔」真係咁可怕？＊
話說利率期貨顯示，花旗議息呢兩日議息結果，加息機會率係１００％。孖屐早前基於花旗國就業數據，２月份為４﹒７個巴仙，按年跌０﹒２個巴仙，進一步印證咗花旗經濟係得嘅，所以孖屐都認為「息魔」不遠。
以往一直認為，「息魔」來臨，磚頭市場又好股票市場都好，都會下跌，投資氣氛又會受到影響，所以「息魔」一向不為人所喜愛。不過事實係，花旗股市升到破頂，道指升破兩萬點關口後連番高收，連帶香江呢邊喺２月時都破埋兩萬四，而磚頭市場亦無懼「息魔」樓價連創新高。
古臣唔識樓市，只講股市。股市總走在實體經濟之前，道指能夠破頂，其實係因為花旗經濟復甦得好所致。加息只係反映花旗國有條件加息，亦即係證實花旗國經濟好，係一項好消息先啱，所以貌似駭人嘅息魔，背後反而有一顆推動資產市場熾熱上揚嘅靈魂！
＊以史為鏡，息升市亦可以升＊
唐朝Ｓｉｍｏｎ Ｌｅｅ（李世民）話：「以史為鏡，可以知興替」。
古臣睇返歷史，自古臣出世以來，花旗第一個加息周期係喺１９９４年２月到１９９５年２月；而第二次係１９９９年６月到２０００年５月；第三次就係２００４年６月到２００６年６月，呢個期間花旗先後加息１７次，將利率由１巴仙調高到５﹒２５巴仙！
香江方面，魚缸喺第二個加息周期同第三個周期時都上升，至於點解第一個加息周期香江下跌呢？其實，係因為花旗第一個加息周期太急太突然，孖屐反應唔切。而之後兩個周期，花旗利率上升步伐都好溫和，加上撞正環球經濟上行周期，企業盈利夠勁，大大利好投資氣氛。
今次加息，起碼神州同花旗兩個大國經濟都見好，而且各國喺息口貨幣上博奕，令到花旗加息都步步為營，業界都睇好香江魚缸可以繼續上升。貝兒都學識了解野獸嘅內涵，話唔埋今次缸友都可以同「息魔」共舞，渡過一個美滿嘅春天呢！
表列截至３月１５日止投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
金隅 １００００股 ３﹒０２元 ３﹒８８元 ３８８００元
匯控 ４００股 ６３﹒００元 ６３﹒６０元 ２５４４０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：６４２４０元
剩餘現金 ：１０６４８元
組合淨值 ：７４８８８元
組合本周收益表現：＋ ４﹒５％
組合本月收益表現：＋ ３﹒７％（截至上月底止組合淨值：７２１９４元）
組合累計收益表現：＋１５﹒２％（本金６５０００元）
＊數據截至今日１１：３０ａｍ
樂本健【秋日開倉26 - 27/9】保健品低至$20！► 火速行動
