古臣深信，要成功就要把握每一分每一秒好好裝備自己，工作如是，投資買股更如是。適逢上個星期六晚（６日）舉行巴郡股東大會，阿臣當然睇實網上直播，趁機跟偶像真．股神巴菲特學返兩招傍吓身。
＊惟利是圖ｖｓ客戶為先＊
巴菲特年屆８６歲，有傳今次會係佢最後一次主持股東大會，大家都好關心繼任人選。股神就列出幾大條件，要求接班人有好耐嘅工作經驗、本身好有錢、唔會因為想賺多１０倍先入嚟做，言下之意即係希望巴郡繼續以股東利益為先，將來嘅揸ｆｉｔ人唔好自顧自搵錢。
或者只係阿臣多心，總覺得股神想提醒世人，特別係一眾ｆｕｎｄ佬、經紀，應該要抱住為客戶服務嘅心，而唔係為ｍｅｅｔ ｔａｒｇｅｔ、分花紅就漠視人客嘅需要；股票市場嘅原意亦係同大眾分享公司嘅增長同利潤，而唔係大股東玩財技、ｃａｐ水嘅地方。但好可惜，喺現今惟利是圖嘅社會中，又有多少人聽得入耳？
＊勇於認錯、敢於嘗試＊
阿臣另一佩服巴菲特之處，在於佢勇於承認過錯。股神提到，最後悔錯過投資現今兩大科技公司谷歌同亞馬遜，更自責又「蠢」又「傻」，「過去竟然唔理解依種網絡商業模式」。投資如為人處世，總難步步完美，但最重要能夠自省、糾正過失。
經股神一言驚醒，阿臣明白唔能夠固步自封。正好古臣上回提到，見匯控（００００５）完成回購計劃，諗住６５蚊左右沽走，估唔到匯控上星期四（３日）放榜季績唔錯，一舉升到６６銀，阿臣目標超額達成。有充足ｃａｓｈ喺手，阿臣下一擊當然係連股神都唱好嘅「新經濟」啦，騰訊（００７００）、瑞聲（０２０１８）、ＩＧＧ（００７９９）？非也非也，緊係試闖論實力、多樣性都更勝一籌嘅美股啦。就等古臣下期話你知隔山買「股」大法！
表列截至５月１０日止投資組合表現：
股份 股數 買入價 賣出價 盈虧（不計手續費）
－－－－－－－－－－－－－－－－－－－－－－－－－－－－－－－－－－－－－－－
匯控 ４００股 ６３﹒００元 ６６﹒３０元 １３２０元
－－－－－－－－－－－－－－－－－－－－－－－－－－－－－－－－－－－－－－－
組合淨值 ：現金７８８８８元（連賣出匯控金額扣除手續費）
組合本月收益表現：＋ ０﹒９％（截至上月底止組合淨值：７８１４８元）
組合累計收益表現：＋２１﹒４％（本金６５０００元）
【你點睇】本港主要銀行跟隨美聯儲減息，你對樓市前景有否信心？► 立即投票
