上星期阿臣講完話覺得個魚缸牛三未來到，所以趁機調整倉位，結果講完無耐，魚缸星期四（１４日）、星期五（１５日）就回落到十天線附近。阿臣都不禁諗，唔通自己真係咁「燈」，呢頭話升嗰頭就跌？盈盈仲走來大罵，話阿臣老點咗佢。不過，阿臣仍然堅持孖屐係向好嘅睇法，同時亦都係因為孖屐跌，咁先可以趁機買貨。
＊金仔發惡，大市照升＊
不過，星期五金仔發射導彈，橫越日本領空，阿臣本以為魚缸又要劇震一下，點知收市魚缸都係微升，而唔少內房表現更比魚缸強得多。當中，阿臣想入嘅雅居樂（０３３８３）無乜機會可以用低價成交到，所以就無追貨到，轉而用筆錢去買越秀地產（００１２３）。阿臣原本諗住越地喺１﹒５５銀確認升勢後先追入，但見衝破１﹒５３銀之後買盤好急，最後即喺１﹒５４銀買入咗兩萬股，總算無睇錯。如果連越地都錯過埋，咁就ｍｉｓｓ咗今次嘅升浪啦！難怪索羅斯（Ｓｏｒｏｓ）話過：「當你見到有泡沫形成緊，應該衝入去！」
據阿臣了解，孖屐好，就會多咗唔少人去證券行開戶口，因為大家都希望發個靚財。阿臣向身邊Ｄ證券界朋友度收到風，話呢排開戶嘅人多咗，做嘢都忙咗。類似嘅情形，同兩年前大時代完結前好相似。仲記得阿臣嗰陣未識玩股票，成日覺得自己唔夠錢，買唔到Ｄ好嘢，所以就愛理不理，連市都懶得睇。依家回首，只能笑自己當時真係太年輕。如果阿臣識得用少少槓桿，大時代嘅時候起碼都撈到Ｄ油水。
＊適度借貸，靈活度增＊
師兄Ｐｈｉｌｉｐ曾經同阿臣講過，借貸炒股係一柄兩面刃，不過小本但又想把握大牛市順風車發一個大財，槓桿係最佳嘅朋友。Ｐｈｉｌｉｐ係股壇老手，借一借孖展都借幾十萬，而且通常都能夠坐足成個升浪先沽貨還錢畀券行。阿臣自問無呢個能耐，但係亦體會得到借貸對投資操作嘅好處。
阿臣翻查歷史，發現牛三時大市威力真係好大，細股更可以有倍升能力，而買殼賣殼活動亦會喺嗰陣變得活躍。假如到時買中一隻，咁個倉一定可以翻倍，不過炒細價股就要做更多功課，同要對魚缸有更深刻認識先得。但無論如何，無錢始終參與唔到個孖屐，所以將來阿臣可能會再注資落倉位度，希望可以好好把握發達機會！
表列截至９月２０日止（１１：３０ａｍ）投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
晨鳴 ４０００股 １２﹒１０元 １４﹒５４元 ５８１６０元
越地 ２００００股 １﹒５４元 １﹒７２元 ３４４００元
美股：
Ｔｅｓｌａ ２股 ３１６美元 ３７５﹒１０美元 ７５０﹒２０美元
＃（約５８５５港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８０４２計算
股票市值 ： ９８４１５元
剩餘現金 ： ３０７８元（扣除買入越地成本及有關交易費）
組合淨值 ：１０１４９３元
組合本月收益表現：＋１４﹒９％（截至上月底止組合淨值：８８３１４元）
組合累計收益表現：＋３５﹒３％（本金７５０００元計）（２０１６年８月開倉）
＊數據截至今日１１：３０ａｍ
【與拍賣官看藝術】常玉作品屢創天價，背後其實藏著跌宕起伏的人生► 即睇
