魚缸上個星期跌足五日，更因為摩指同恒指執位同調整比重，多隻股份下調。其中最多人關心嘅ＱＱ（００７００），股價跌穿４００蚊關口，一直碌到３８５蚊，到星期一（１２月４日）更加一開市就跌穿３８０蚊，最低見３７７﹒２銀，但其後嚟個大反擊，一口氣升廿蚊左右，直上３９７﹒８銀。到今日（６日），暫時又最低見３７４銀，咁嘅市，真係玩死唔少人。
＊牛證加劇ＱＱ跌勢，３８０元以下值博＊
同傳統大牛市唔同，今年魚缸嘅玩法係「強者愈強」，如果用舊思維去炒，以為未炒嘅板塊會終有一日炒到嘅話，恐怕最終就只能食白果。另一方面，投資者亦唔傻，眼見ＱＱ係咁升，但又想分一杯羹，可惜一手又太貴，於是一眾散戶都湧入ｃａｌｌ輪同牛證。就連阿臣一個前同事，玩開細價股突然都想買ｃａｌｌ輪博一博，人同此心，其他散戶亦如是。
不過，歷史又重演，散戶總係淪為被大戶嘅點心。而且由於牛證太多，加上好多投資者買嘅係貼價嘅牛證，希望博佢大Ｄ槓桿賺多Ｄ，但結果就惹來連鎖反應。當ＱＱ一跌穿４００蚊就一路再跌，唔少牛證要回收，發行商亦需要沽出相應數量嘅ＱＱ進一步擴大咗個跌幅。
到星期一（４日），ＱＱ一開市再插一插，再殺埋貼價嘅牛證。一殺完之後，ＱＱ立即反彈。不過預計短期內部分投資者都已經喺３８０蚊撈ＱＱ或者入牛證。阿臣唔排除ＱＱ會再震盪一吓殺多次呢班新一批入市嘅好友。不，過放長線嚟睇，以呢個價錢買入ＱＱ正股亦無壞。所以阿臣遲吓會擺多少少錢入倉，然後喺３８０銀以下買多手ＱＱ。
＊港股上落市格局，睇好Ａ股下一年表現＊
經歷過星期一朝早下跌之後，當日阿臣認為可以以當日恒指最低位２８８０３點作指標，只要往後唔跌穿呢個位置，都唔需要太害怕。不過，嚟到今日，早上大市一度挫４７１點去到
２８３７１點，阿臣確認大市進入調整期。今個月有加息因素，而大市震盪過後投資者恐慌情緒又升溫，唔少大股已經回落緊，聖誕節又臨近，基金如果Ｔａｋｅ Ｐｒｏｆｉｔ亦實在無可厚非，不過大牛市中嘅跌市係入市良機，只係阿臣會小心唔會跟車太貼。
大行瑞銀早前為阿臣打咗枝強心針。瑞銀發表港股策略報告，預計恒指明年底目標為
３２４０１點，而南下資金帶動下，北水持有港股嘅比重將進一步上升，港股將繼續獲估值重估，只係由於內地證券市場監管者會嘗試先令港股冷卻一下，所以出年上半年港股料較波動。今次魚缸嘅調整，都係由Ａ場震盪而起。Ａ場而家都未點大升過，今年升幅都只係５﹒８個巴仙，連港股都不如。不過阿臣相信阿爺經濟條件，絕對支撐得起Ａ場上揚多少少。加上環球錢太多，Ａ場下年又有入摩因素，所以阿臣堅決睇好Ａ股下年表現，喺１５﹒４附近買少少南方Ａ５０
（０２８２２）先！
表列截至１２月６日止（１１：３０ａｍ）投資組合表現：
股份 股數 買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
騰訊 １００股 ３５０﹒００元 ３７３﹒４００元 ３７３４０元
南方Ａ５０牛 ８萬股 ０﹒１９１元 ０﹒１０２元 ８１６０元
美股：
Ｔｅｓｌａ ２股 ３１６美元 ３０３﹒７０美元 ６０７﹒４０美元
＃（約４７４６港元）
亞馬遜 １股 ９７３美元 １１４１﹒５７美元 １１４１﹒５７美元
＃（約８９２１港元）
－－－－－－－－－－－－－－－－－－－－－－－－－－－－－－－－－－－－－－－－
＃以美電７﹒８１４３計算
股票市值 ： ５９１６７元
剩餘現金 ： ３２６２２元
組合淨值 ： ９１７８９元
組合本月收益表現：－ ２﹒４％（截至上月底止組合淨值：９４０５２元）
組合累計收益表現：＋２２﹒４％（本金７５０００元計）（２０１６年８月開倉）
＊數據截至今日１１：３０ａｍ
【與拍賣官看藝術】常玉作品屢創天價，背後其實藏著跌宕起伏的人生► 即睇
