上星期民間特首「劉華」因為撐東大嶼人工島計劃而成為全城熱話，填海適唔適合香江阿臣唔知，不過就睇得出今屆政府似乎對填海計劃勢在必行，因為上屆政府已經提出嘅大嶼山東部水域填海建人工島。
今屆政府亦再接再厲，傳出除咗講明會實現東大嶼都會，亦講到公私營房屋由七比三改為六比四，而且推公私營土地，希望釋出新界農地，早前又有多項辣招包括推出５２折居屋，都睇到現屆政府有意重建置業階梯。不過，現時樓價喺一年內已經升咗近二成，而公屋輪候冊早前亦刷新歷史新高至５﹒３年，而上個月美國聯儲局一如預期加息０﹒２５厘，本地錢莊好似獅子銀行同中銀（０２３８８）相繼調高最優惠利率（Ｐ），隨住「息魔」殺到本地一眾地產股股價開始向下，部分樓盤亦出現劈價，究竟依加係咪買樓或者買入地產股嘅時機呢？
＊樓市未加Ｐ前已跌，二手樓交投淡＊
樓市點走會升定跌，不如等數據大家知。首先喺未加Ｐ前，據差餉物業估價署最新數據，８月份住宅售價指數，按月已經下跌０﹒０８巴仙，係樓價過去２８個月以來首次錄得跌幅，而反映主要大型屋苑二手住宅樓市嘅中原城市指數ＣＣＬ，最新報１８５﹒５１點，按周跌０﹒５８巴仙，而同上月比較下跌１﹒５５巴仙。租樓嘅回報率方面，如果係面積４３１方呎以下嘅細單位，８月份租金回報率大概係２﹒６厘，重返今年６月水平，但相比上年同期２﹒８厘，仍走低約０﹒２個巴仙。總總數據似乎都講緊樓價會下跌，部分大行好似里昂同高盛亦發表研究報告，話未來１２個月樓價或者下跌１５巴仙，
＊公私營合作，地產股噚日率先炒上＊
樓市由２００８年開始就一直攀升，中間喺２０１５年８月到２０１６年４月曾經回落，但之後繼續展開升勢，近期新盤交投仍然活躍，不過阿臣就睇到有部分新盤，開始以減價出售，唔排除多個地產商見樓價開始見頂而密密沽貨，好似萬科（０２２０２）新盤屯門上源，實用呎價竟低過一萬銀，阿臣都諗有無咁筍啊！
睇返本地地產股，今年施政報告其中一個焦點，係上年已經放風嘅公私營合作，喺噚日（８日）部分地產股已經借消息炒上，如果睇短炒嘅缸友，可以留意吓今日依家公布緊嘅施政報告，提提大家現時擁有新界最多農地，係坐擁４４９０萬方呎嘅恒地（０００１２），至於現時係咪長線入貨嘅時機，咁就要睇睇各位缸友，對樓市未來嘅睇法喇。
＊港股１５個月低，好彩ＱＱ早斬纜＊
講返阿臣個倉。港股通今個星期復市，雖然人行喺Ａ股復市前夕宣布降準，但中港兩地市況仍然疲弱，噚日曾經低見２６０６８點，再創近１５個月低，阿臣記得上個星期仲講緊失守２７０００關口不遠，今個星期已經轉口話穿２６０００關口不遠，個底愈搵愈低，孖屐有機會先望２５５００點，即係上年５至６月左右橫行一段時間日子嘅水平。
阿臣覺得自己都幾好彩，喺ＱＱ（００７００）３３０銀嘅時侯走人，事關噚日已經穿咗３００銀關口，不過就買入另一個當跌版塊－－內房股。本來阿臣諗住可以博恒大（０３３３３）反彈去３０銀，不過就睇錯市，依加都要諗諗幾時斬纜走人，另一隻領展（００８２３）噚日再傳會出售商場，雖然係高位回落唔少，但如果出售成功股價應該會彈返上去。
表列截至１０月１０日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
恒大 １０００股 ２５﹒９５元 ２０﹒９０元 ２０９００元
寶勝 １００００股 １﹒５６元 １﹒５０元 １５０００元
粵海投資 ２０００股 １３﹒００元 １４﹒０６元 ２８１２０元
領展 ５００股 ７５﹒３５元 ７３﹒１５元 ３６５７５元
－－－－－－－－－－－－－－－－－－－－－－－－－－－－－－－－－－－－－－－－
股票市值 ：１００５９５元
剩餘現金 ： ４６７５９元
組合淨值 ：１４７３５４元
組合本月收益表現： － ２﹒２％（截至上月底止組合淨值：１５０６３４元）
組合累計收益表現： ＋ ４０﹒３％（本金１０５０００元計）（２０１６年８月開倉）
＊數據截至今日１１：００ａｍ
樂本健【秋日開倉26 - 27/9】保健品低至$20！► 火速行動
