舊年香江魚缸強勢彈起３６巴仙或近八千點，牛氣沖天下缸友幾乎買乜都有錢賺，「股王」ＱＱ（００７００）急彈超過１倍，據聞有缸友買咗ＱＱ嘅衍生產品，順利儲到錢買樓同另一半拉埋天窗添！可惜，阿臣上年只係買ＱＱ正股，自知承受風險程度不大，只好講句：「這些機會不是屬於我的」。
不過，今年魚缸自年頭起開始大插水，年初至今累跌４６００點或１５巴仙，ＱＱ當然「Ｙｏｕ ｊｕｍｐ，Ｉ ｊｕｍｐ」，今年以嚟已經唔見咗三成。阿臣個倉好彩早喺３３０銀沽走ＱＱ，壯士斷臂，依家輸少當贏。
＊ＱＱ升上１０００蚊可成真？＊
ＱＱ近幾月可以話「黑過墨斗」，先係今年業績差過孖屐預期，其次官媒多番打壓話手遊扭曲青少年思想，而且「孖屐」都話過嚟緊會凍結遊戲申請審批，令ＱＱ失去咗增長嘅火車頭，加上「食雞」仲未賺錢，股價當然凍過水啦！
不過之前一個信奉趨勢投資嘅「女股神」曾經講過，ＱＱ可以喺２０２０年上到１０００銀喎，仲話收到馬化騰對佢講ＱＱ股價會「穩健穩健」向散戶大派定心丸。「女股神」呢個願望兩年後成唔成真古臣就唔知，但ＱＱ要升返上歷史高位４７５﹒７２銀（除息後計），恐怕喺呢一兩年難以成事；再講，ＱＱ可能仲要再跌，本月低位２６５銀恐怕仲未係最底。
阿臣一直都話投資信人不如信自己。２４年前瑞典就做咗個實驗，搵咗一隻猩猩「大戰」五個投資專家，結果發現由專家經過分析所挑選出嚟嘅股票組合，得出嘅投資回報率遠遠唔及矇住眼嘅猩猩隨機揀出嚟嘅股份投資回報高。
根據金融評鑑機構Ｌｉｐｐｅｒ Ａｎａｌｙｔｉｃａｌ Ｓｅｒｖｉｃｅｓ嘅統計顯示，大部分９０年代花旗國基金嘅ｐｏｒｔｆｏｌｉｏ投資回報率遠遠低過標準普爾５００指數。換句話說，大家與其花大筆錢請專家幫自己投資，將呢筆錢平均投資喺指數入面嘅股票到，回報率會更可觀！
呢啲數字同時傳遞咗一個令人震驚嘅消息：投資專家們高薪厚職，運用累積好多年嘅基本面、技術面、同埋籌碼面相關嘅經驗作分析，好多都喺徒勞無功，得個「吉」！
＊踏入業績期料暫守２５０００＊
講返阿臣個倉。魚缸今個月都可以話十分動盪，先係喺１１日經歷大跌市，之後連續幾日陰跌，到上星期五（１９日）喺神州官員維穩下，魚缸兩日升咗６９８點，收復１１日嘅下跌裂口（２５４３７至２６１９３點），不過始終都曇花一現，噚日收跌８０６點抵銷晒呢兩日升幅有突，雖然下個月中美兩國總統會晤，但相信對貿易戰影響不大，不過嚟緊踏入業績期魚缸應該喺２５０００點有支持。
內房股寒冬唔講大家都知，阿臣睇錯市買入恒大（０３３３３），依加希望彈返上買入價就斬纜走人，另一隻過往強勢嘅領展（００８２３）都係高位回落唔少。阿臣個倉帳面仲有賺嘅只有粵海投資（００２７０），阿臣諗諗喺市況麻麻嘅情況下，好唔好一股不留，拎筆錢做定存會唔會更好呢？
表列截至１０月２４日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
恒大 １０００股 ２５﹒９５元 １９﹒０６元 １９０６０元
寶勝 １００００股 １﹒５６元 １﹒５０元 １５０００元
粵海投資 ２０００股 １３﹒００元 １３﹒６０元 ２７２００元
領展 ５００股 ７５﹒３５元 ７３﹒００元 ３６５００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ９７７６０元
剩餘現金 ： ４６７５９元
組合淨值 ：１４４５１９元
組合本月收益表現： － ４﹒１％（截至上月底止組合淨值：１５０６３４元）
組合累計收益表現： ＋ ３７﹒６％（本金１０５０００元計）（２０１６年８月開倉）
＊數據截至今日１１：００ａｍ
【你點睇】的士記分制將於周末生效，你認為該制度可否幫助的士提升服務質素？► 立即投票
