本港四大錢莊，有三間公布季績，其中中銀（０２３８８）未如孖屐如期，加上績後已經出口術，叫分析員唔好對第四季同明年估得太好，咁所以股價當然唔好睇啦，直至上星期五（２日），以近一個月計，中銀跌最多近１５巴仙，渣打同恒小象（０００１１）就跌介乎７巴仙至８巴仙，大象（００００５）跌大約２巴仙。
＊大象可分注買入，暫５０天線見阻力＊
點解大象跌咁少？因為上星期公布嘅第三季業績畀到大家驚喜啊。睇返盤數先，大象第三季稅前利潤５９﹒２２億美金增長２８巴仙，勝孖屐預期，加上季內經調整收入增長高於支出增長，刺激股價做好，其實自新任ＣＥＯ范寧上場以來，大象嘅成本一直上升，上半年ＪＡＷＳ（收入增長率與支出增長率之差）出現負數超過５巴仙，而第三季ＪＡＷＳ竟然就錄得正數６巴仙，而整個首三季就大幅收窄到負１﹒６巴仙，孖屐當然畀ｌｉｋｅ喇。
大象今次業績可以話要收入有收入，減支出就減支出。瑞銀就話，大象第三季經調整稅前盈利高市場預期９巴仙，雖然淨利息收入低預期１巴仙，但非利息收入就大升預期８巴仙，將佢他屐由６７銀升到６８銀，維持「中性」投資評級。
現時大象息率有６厘，其實真係十分吸引，業績咁靚仔其值唔值現價買入呢？其實今次第三季業績可以有咁好表現，大象都話主要依賴貸款增長強勁同受惠利息收入，７到９月就批多咗１５２億美金貸款，以歐洲增長最多，按季增加３巴仙，但相比之下香江只有增長１巴仙，而且非利息收入無論按年同按季都要下跌，加上之前各大行喺大象派成績表前，都唔太睇好齊齊唱淡，今次守得住６０銀關口，但都唔代表可以擺脫過去頹勢。
參考過去歷史數據，以往大象第四季嘅業績都會走樣，缸友們都要考量一下，究竟盈利喺第三季係咪已經見頂？加上今次ＪＡＷＳ大幅收窄，反映呢年大象擴張業務嘅成功，但環球經濟不穩相信缸友們都知，現時逆風航行會唔會令之後成本增加返呢？
睇返公仔圖，大象自公布業績之後，股價已經由１０底嘅低位６０﹒３５銀反彈，收復１０天（目前約６４﹒２０銀）、２０天（６４﹒３８銀）同觸及５０天線（６８﹒９３），加上最新公布平保（０２３１８）成為大象單一最大股東，持股量達７﹒０１巴仙，一向受北水歡迎嘅大象，股價應該可以企穩６５銀，但５０天線位置就見阻力，不過有成６厘息咁多，分注買入都唔差，按大象喺香江業務推算，預料小象上季業務都應該見得人，對大象股價都應該有幫助。
＊留意花旗國選舉結果及儲局會後聲明＊
講返阿臣個倉。
彭博上周五嘅報道引述消息指侵侵已經指示內閣官員草擬美方可能提出美中貿易條款，帶動魚缸升逾千點，但隨住白宮國家經濟委員會主任庫德洛急急澄清話無呢回事，魚缸前日（５日）即刻倒跌逾一半升幅，喺二萬六點之間增持。不過，大家憧憬今個月尾舉行嘅「習特會」如果有成果，累跌多時嘅魚缸應該可以嚟一個反彈，而今個星期大家就先睇吓花旗國中期選舉結果，多個據花旗國民調結果顯示，民主黨將會喺中期選舉奪得眾議院控制權，共和黨則繼續掌握參議院控制權。其次，大家要留意香江星期五（９日）凌晨，聯儲局公布議息結果，雖市場預期會按兵不動，但花旗國１０月就業數據同三季ＧＤＰ好過孖屐預期，如果會後聲明採用更「鷹派」言論，可能就會再推高美金同美債息表現，為魚缸走勢增添隱憂，所以缸友們都要留意啊。
個股方面，粵海投資（００２７０）繼續強勢，阿臣當然唔會沽貨走人住，而其他幾隻魚毛就仍然蝕價，恒大（０３３３３）之前發債撲水，加上十月合約銷售額按年跌６巴仙，而首十個月就升１９巴仙，阿臣仍然等佢反彈到２０銀就走人。另一隻寶勝（０３８１３）就喺彈返上買入價之後再沽出。
表列截至１１月０６日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
恒大 １０００股 ２５﹒９５元 １８﹒８４元 １８８４０元
寶勝 １００００股 １﹒５６元 １﹒４９元 １４９００元
粵海投資 ２０００股 １３﹒００元 １３﹒９４元 ２７８８０元
領展 ５００股 ７５﹒３５元 ７１﹒８５元 ３５９２５元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ９７５４５元
剩餘現金 ： ４６７５９元
組合淨值 ：１４４３０４元
組合本月收益表現： ＋ ０﹒８％（截至上月底止組合淨值：１４３１０９元）
組合累計收益表現： ＋３７﹒４％（本金１０５０００元計）（２０１６年８月開倉）
＊數據截至今日１１：００ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
