近排幾觸動到古臣嘅神經，就係油價由高位回落，迅速進入熊市，連跌第七個星期，上星期五（２３日）油價就試過暴跌近８巴仙，觸及逾一年低位，以現時油價嚟睇，按年變幅已跌至負數，所以大家都見到之前強勢嘅「三桶油」都由高位回落唔少，不過其實油價再跌，除咗影響相關股份之外，可能對未來聯儲局加息嘅進程都會有影響。
＊下年加息止步？大行睇法各不同＊
油價大跌，星期日（２６日）侵侵當然即刻喺Ｔｗｉｔｔｅｒ上邀功，話油價下跌如同大幅減稅，對花旗國經濟嚟講係一個好消息，仲話通脹會跌，仲抵死咁問聯儲局聽到未啊？不過，其實聯儲局係一個獨立機構，所以任何決策都唔會被人左右，最大任務就係令就業率「最大化」同埋對抗通脹，而通脹其中一個指標就係油價。
現時油價下跌，除咗係因為石油供應過剩之外，仲涉及「孖屐」對未來全球經濟放緩嘅憂慮，現時油價按年變幅已跌至負數；如果情況持續，或者會令到花旗國通脹降溫，亦有可能左右加息進程。
喺阿臣執筆嘅時間，花旗國利率期貨反映，下個月加息嘅機會仍然有７２﹒６巴仙，但比之前７４巴仙下跌，而出年１月同３月加息機會率分別為７４巴仙同８６﹒４巴仙，比月初７２﹒５巴仙同９０﹒６巴仙有升有跌。
睇埋大行點睇啊，細摩同高佬估計，連埋下個月同下年總共會上調利率五次；而大摩就認為，聯儲局下年只會再加息兩次，其中細摩就話若果花旗國失業率降至３﹒３巴仙，而通脹指標升至２﹒３巴仙，就可以示為加息嘅訊號。
究竟下年加息次數幾多，或者缸友們可以留意吓，下個月花旗國嘅通脹同就業數據，若果數據有放慢跡象，聯儲局可能就會減慢加息步伐。近排一眾同息口敏感嘅地產股已經率先受追捧，普遍都升３巴仙或以上，加上之前部分股價已經跌咁上吓，缸友們如果有閒錢，都可以考慮小注博佢哋反彈啊。
＊大市去向如何，還看Ｇ２０峰會＊
講返阿臣個倉。
港股呢個星期都係繼續靜局，或者缸友們等緊今個星期五（３０日）開幕嘅Ｇ２０峰會，習特會前，都未敢買貨住，近排成交仲愈玩愈縮水，上星期五創近２２個月單日最低，主板成交只有５９５億銀，反映投資者對入市嘅態度都十分謹慎。
不過都難怪嘅，「侵侵」上星期四（２２日）先話，喺Ｇ２０峰會期間，會同習大大會面，又認為可以達成協議，結束貿易戰，但星期一又轉口風，話出年１月１日神州可能難逃被花旗國，追加關稅稅率到２５巴仙嘅「命運」，所以話大市去向如何，還看Ｇ２０以後。
個股方面，粵海投資（００２７０）繼續強勢，股價創新高，暫時最高見１５﹒３２銀，帳面仲有賺。另一隻公用股，領展（００８２３）噚日除淨，每股派中期息１﹒３０６２銀，會有６５３銀落袋，其次領展亦公布用逾２５億人仔買北京京通羅斯福廣場，係佢神州一線城市第４個收購項目，預計收購完成之後，能夠為佢帶來即時收入，令神州資產佔領展總資產值增至至９﹒５巴仙。而另一隻寶勝（０３８１３）就繼續未上返買入價。
表列截至１１月２８日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
寶勝 １００００股 １﹒５６元 １﹒４８元 １４８００元
粵海投資 ２０００股 １３﹒００元 １５﹒２６元 ３０５２０元
領展 ５００股 ７５﹒３５元 ７３﹒８０元 ３６９００元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ８２２２０元
剩餘現金 ： ６７９７１元
組合淨值 ：１５０１９１元
組合本月收益表現： ＋ ４﹒９％（截至上月底止組合淨值：１４３１０９元）
組合累計收益表現： ＋４３﹒０％（本金１０５０００元計）（２０１６年８月開倉）
＊數據截至今日１１：００ａｍ
【你點睇】的士記分制將於周末生效，你認為該制度可否幫助的士提升服務質素？► 立即投票
