《古臣周記》貿戰停火９０日，魚缸樂歡欣？

　　一直纏繞住香江同神州嘅中美貿易戰，終於喺上星期六（１日）之後見到緩和嘅跡象，沉寂多時嘅魚缸，星期一（３日）開市就嚟個暴力升市，見兩個月高位，並企穩１００天線並收復２７０００關口，但隨後幾日都係高位整固，相信魚缸要再上試二萬八點仍然有一段時間。

＊本月或借貿易戰小休粉飾櫥窗＊
　　
　　或者等古臣講吓今次呢次「習特會」個「刁」傾咗咩返嚟啦。首先之前大家都驚緊嘅２０１９年１月１號二千億美金中國商品關稅會加到去２５巴仙，最新協議是維持１０巴仙，但如果中美雙方唔可以喺９０日內達成協議，咁關稅就會予以調升。
　　中美雙方除咗暫停加徵額外關稅，神州亦承諾加碼購買花旗國農業、能源、工業及其他產品，以減輕兩國之間嘅貿易失衡。另外，星期一（４日）嘅時侯，侵侵喺ｔｗｉｔｔｅｒ表示，神州已經同意下調同取消對花旗國嘅砵砵車加徵進口關稅，現時神州對花旗國國產砵砵車關稅大約係４０巴仙，所以今次貿戰停火，都唔係隻隻魚毛有得升，部分汽車股星期一就見到升勢收窄，甚至逆市倒跌。不過，一啲出口股，好似敏華控股（０１９９９）同創科實業（００６６９）就當然有得升啦，一眾航運股亦喺上個星期五（１１月３０日）已經偷步炒作，現時神州會恢復購買花旗國嘅農產品，所以預期亦會有利貨航運業務。
　　據外媒引述消息報道，國務院副總理劉鶴考慮喺未來幾個星期內，率領為數３０人嘅代表團前往華盛頓談判，雙方會面日期會喺１２月１２日至１５日，就現時雙方談判睇，可唔可以喺９０日內有美滿結果仍然係未知之數，但至少有一段時間緩衝，相信嚟緊１２月孖屐會借貿易戰小休，而底前基金亦作粉飾櫥窗，之前買落貨嘅缸友可以先搵定個靚位先行止賺啊。

＊油組明日開會，減產協議或影響聯儲局加息進程＊　　
　　
　　講返阿臣個倉。
　　貿戰停火９０日之後，魚缸最近成交開始回升，相信繼１１月之後都應該可以見返支陽燭同上試２８０００點。雖然貿易戰暫緩，但都仲有幾件事缸友值得留意，好似聽日（６日）嘅油組會議，佢哋就會討論減產，相信未來會影響油價走勢，同時影響未來聯儲局加息嘅進程，所以缸友們都要留意啊。另外，美債孳息曲線出現倒掛，隔晚美股三大指數急瀉超過３巴仙，其中道指急挫７９９點，明顯表示大家對經濟衰退嘅憂慮未除，所以缸友都係短線炒吓波幅好，長線就仲要睇定啲。
　　個股方面，粵海投資（００２７０）星期一人人升嘅時候，佢就大大支陰燭落，不過隨住隔晚美股大跌，資金再走人公用股避險，今日粵海投資同領展（００８２３）都靠穩。阿臣之前沽咗嘅恒大（０３３３３）早前六連升之後已經上返買入價２５銀，古臣早沽無咗５０００幾銀，不過就當係買個教訓，等古臣下次睇定啲先做部署。
　　古臣考慮緊買入近日強勢嘅華潤電力（００８３６），主要考慮是煤價下跌相信會改善佢嘅毛利，而且現時有近６厘息有一定防守性。不過昨晚美股大跌，令古臣驚驚，所以想過埋今個星期魚缸整固之後再諗。

　　表列截至１２月５日（１１：００ａｍ止）投資組合表現：

　　股份　　　　　　股數　　　　平均買入價　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　寶勝　　　１００００股　　　　１﹒５６元　　　　１﹒５１元　　　１５１００元
　　粵海投資　　２０００股　　　１３﹒００元　　　１４﹒５２元　　　２９０４０元
　　領展　　　　　５００股　　　７５﹒３５元　　　７６﹒８５元　　　３８４２５元
　　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　　　：　８２５６５元
　　剩餘現金　　　　　　：　６７９７１元
　　組合淨值　　　　　　：１５０５３６元
　　組合本月收益表現：　＋　０﹒１％（截至上月底止組合淨值：１５０３２１元）
　　組合累計收益表現：　＋４３﹒４％（本金１０５０００元計）（２０１６年８月開倉）

　　＊數據截至今日１１：００ａｍ