《古臣周記》「一月效應」變成魚缸傳說？

　　２０１８年過去，２０１９年來臨，阿臣祝各位缸友新年進步，身心健康，炒股炒得精明過人。
　　新年伊始，魚缸傳統有「１月效應」講法，原自花旗國，此有兩方面，一說每年１月份，魚缸必然上升；另一說，１月份股市嘅走勢可以啟示全年表現，即係話１月市升全年市亦升，１月份市跌全年埋單亦跌。
　　用１月份表現來推測全年表現，阿臣暫且不討論，始終一年流流長，好多因素改變魚缸走勢。阿臣集中睇下１月份例升之說。

＊年底沽貨扣稅，１月份買貨順理成章＊

　　１月效應，原自花旗國魚缸，大戶通常常喺年尾出貨，新一年開始買貨，故１月份個市自然向上。花旗國大戶年尾掟貨，唔係怕持貨過年風險增加，而係　稅務考慮。花旗國稅法係咁嘅：如果買股獲得盈利，就要畀「資本增值稅」（Ｃａｐｉｔａｌ　Ｇａｉｎ　Ｔａｘ）；如果賣出股票蝕錢嘅話，原則上，這些虧損可以扣稅。是否要畀稅，是根據實質買賣賺取多少而計，不是計帳面數；同樣，如果持有股票錄帳面虧損，要把股票沽出由帳面虧損變成實際虧損，才能獲得稅務扣減。
　　大戶藉股票投資蝕錢扣稅，除時畀少好多稅款，可能除笨有精。稅款計完，大戶大把茄殊喺手，新一年開始買貨，順理成章，若果個個咁做，１月份魚缸自然向上。
　　除咗稅務因素外，亦有指企業通常於１月發放年終花紅，投資者有錢喺手，　買貨亦從心所欲，亦是１月份魚缸升多跌小之說由來。
　　當然，亦有投資者抱住「一年之計在春（首月）」，故１月份開始投資計劃正常不過，亦為「１月效應」注入動力。

＊魚缸複雜多變，傳統「定律」難持續＊

　　但係，數據顯示，實情唔係咁樣，起碼千禧年以來見唔到「１月效應」。花旗國股市，以標指計，２０００年以來共有１９個１月份，升跌差不多，準確來說更是跌的比升的多（見表）。江恒指方面，１９年來，１月份升的多過跌的一次，顯現「１月效應」亦說不說不過來。
　　似乎喺２１世紀以來，金融市場愈來愈複雜多變，股市傳統「定律」可能，只係上世紀留下來嘅「傳說」。
　
　　表列過去恒指及標指一月表現：

　　年份　　　　　　　恒指　　　標指　　│　　年份　　　　　　　恒指　　　標指　
　　－－－－－－－－－－－－－－－－－－－－－－－－－－－－－－－－－－－－－－－
　　２０１８年１月　　上升　　　上升　　│　　２００９年１月　　下跌　　　下跌
　　２０１７年１月　　上升　　　上升　　│　　２００８年１月　　下跌　　　下跌
　　２０１６年１月　　下跌　　　下跌　　│　　２００７年１月　　上升　　　上升
　　２０１５年１月　　上升　　　下跌　　│　　２００６年１月　　上升　　　上升
　　２０１４年１月　　下跌　　　下跌　　│　　２００５年１月　　下跌　　　下跌
　　２０１３年１月　　上升　　　上升　　│　　２００４年１月　　上升　　　上升
　　２０１２年１月　　上升　　　上升　　│　　２００３年１月　　下跌　　　下跌
　　２０１１年１月　　上升　　　上升　　│　　２００２年１月　　下跌　　　下跌
　　２０１０年１月　　下跌　　　下跌　　│　　２００１年１月　　上升　　　上升
　　　　　　　　　　　　　　　　　　　　│　　２０００年１月　　下跌　　　下跌
　－－－－－－－－－－－－－－－－－－－－－－－－－－－－－－－－－－－－－－－－

＊利淡消息不斷，魚缸試２５０００關口＊　　
　
　　講返阿臣個倉。
　　喺阿臣出國呢段時間，魚缸都係難逃跌勢，最終以２５８４６點收爐，總結全年收跌
１３﹒６％係七年來最差。各大行對今年嘅經濟前景都唔太睇好，而且預計今年都會維持波動市。睇返公仔圖其實魚缸走勢一啲都未見好轉，由上個月高位２７２６０睇起，已經形成一個小型下跌軌，而且１０天線又穿咗２０天線同５０天線，今日（２日）又再一支陰燭落，似乎想再下試２５０００關口。
　　今日財新公布神州１２月製造業ＰＭＩ降至４９﹒７係１９個月新低，另外侵侵話同習大大雖然有良好嘅通話，不過外媒就大撥冷水，話侵侵可能高估雙方談判進展，所以就咁睇魚缸走勢似乎都難有改善。
　　個股方面，動盪市之下，資金再走入公用股避險，粵海投資（００２７０）同領展
（００８２３）走勢仍然都唔錯。其中領展再創股價新高７９﹒９５銀，而且最近再啟動回購方案，股價應該仲有上升空間。另外阿臣見內地時隔９個月之後，再公布遊戲獲發版號，雖然暫時未見ＱＱ（００７００）未上榜，但版號係按照申報時間順序審批發放，所以阿臣考慮緊等ＱＱ落返２７０銀左右，博佢有一轉反彈。

　　表列截至１月２日（１１：００ａｍ止）投資組合表現：
　
　　股份　　　　　　股數　　　　平均買入價　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　寶勝　　　１００００股　　　　１﹒５６元　　　１﹒５０元　　　１５０００元
　　粵海投資　　２０００股　　　１３﹒００元　　１４﹒８２元　　　２９６４０元
　　領展　　　　　５００股　　　７５﹒３５元　　７８﹒２０元　　　３９１００元
　　－－－－－－－－－－－－－－－－－－－－－－－－－－－－－－－－－－－－－－－－
　　股票市值　　　　　　：　８３７４０元
　　剩餘現金　　　　　　：　６７９７１元
　　組合淨值　　　　　　：１５１７１１元
　　組合本月收益表現：　－　０﹒８％（截至上月底止組合淨值：１５３００１元）
　　組合累計收益表現：　＋４４﹒５％（本金１０５０００元計）（２０１６年８月開倉）
　
　　＊數據截至今日１１：００ａｍ