全國「兩會」開咗一個星期，缸友應該聽咗當中一啲嘅政策，不過涉及嘅板塊同數字咁多，不如等阿臣一連兩個星期，整合下「兩會」有咩政策要留意，同對相關魚毛嘅影響如何啊。呢屆「兩會」都可以話「有辣有唔辣」，部分魚毛因為一啲政策風向，已經率先跌咗一陣，不過亦有啲因此受惠，今集阿臣先講吓相關受惠嘅魚毛啦！
＊中國建築受惠減稅及大灣區發展＊
今年國務院總理李克強就講到會加大規模減稅，其中製造業由１６巴仙嘅增值稅降至１３巴仙，交通運輸業、建築業等行業亦由現時１０巴仙嘅稅率降至９巴仙。至於喺地區政策方面，繼粵港澳大灣區、京津冀之後，「兩會」亦將長三角區域一體化發展為國家戰略，而基建投放就基本同上年持平，鐵路投資要完成８０００億人仔，公路水運投資１﹒８萬億人仔。
缸友睇到，當然會覺得今次減稅同投資最受惠嘅係一眾基建佬啦，不過阿臣就睇咗招銀國際嘅一份報告話，揀基建股都要有先後，招銀國際預計，其中最能夠受惠嘅會係工程機械股、其次先到鐵路基建股，因為前者嘅議價能力比後者較強，而產品亦比較多元化同置於行業下游，所以比較受惠稅務優惠，其中該行最推薦嘅魚毛係受惠大灣區基建嘅受益者中國建築（０３３１１），畀佢「買貨」投資評級同１１﹒４銀目標價，隻股依家只係８個半左右，仲有大掘水位。
＊教育政策側重職教，揀股要留神＊
另外，之前受政策風向影響而下跌嘅教育股喺今次「兩會」，終於都有政策出台扶一扶持，「兩會」就講到今年教育經費要繼續保持ＧＤＰ比例４巴仙以上，另外亦會投放１萬億人仔。今次政策最大嘅資源主要投放喺職業教育、在職培訓方面，對於學前教育雖然有著墨，不過相關嘅著眼點唔多，所以最好揀一啲專注於專科教育嘅魚毛，好似中教控股（００８３９）、新高教（０２００１）同希望教育（０１７６５），呢幾隻魚毛喺呢幾個月都有唔錯嘅升浪，其中希望教育最新就宣布用７０００萬人仔，買貴州大學科技學院，睇埋公仔圖啊，股價亦由上年１２月開始做咗個圓底，嚟緊有望挑戰１﹒５銀嘅位置。
好啦，今集阿臣就講住咁多先，下集再講一啲受政策風向影響嘅魚毛啊。
＊港股技術走勢轉弱，缸友要睇路＊
魚缸呢個星期都係坐過山車啊，幾次都上唔返二萬九關口喺附近上上落落，其實就咁睇技術指標，魚缸上星期五（８日）回落，以黃金比率計已經穿過今年以嚟升幅嘅２３﹒６巴仙（即２８２１６點水平），以及跌穿牛熊線（約２８１９８點），但本周一（１１日）起有反彈，可以反映２８２００呢個水平有支持。
不過，魚缸十天線（約２８７６１）現時有下墜嘅跡象，如果短期內向下穿埋廿天線（約２８６４８），形成死亡交叉，咁短期估計魚缸就要再穿牛熊線下試低位。再者，ＲＳＩ自上星期三（６日）出現三頂背馳，反映上升勢頭減弱。港匯最近再次觸及弱方兌換保證，金管局又再入市接錢。「兩會」之一的全國政協今日結束，滬深兩地魚缸今早見調整，香江亦難獨善其身，缸友都要識睇路喇！
阿臣個倉暫時持貨不多，呢個星期按兵不動。
表列截至３月１３日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
華潤電力 ４０００股 １５﹒２８元 １４﹒５８元 ５８３２０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ５８３２０元
剩餘現金 ： ９５９４０元
組合淨值 ：１５４２６０元
組合本月收益表現： － ０﹒５％（截至上月底止組合淨值：１５５０７０元）
組合累計收益表現： ＋４６﹒９％（本金１０５０００元計）（２０１６年８月開倉）
＊數據截至今日１１：００ａｍ
全新節目《說說心理話》青少年不可以戀愛！？真實個案講述驚心動魄經歷► 即睇
