全國「兩會」上星期五（１５日）結束，總理李克強鐵定會喺４月起減增值稅，５月起降社保費率，加上米字國「脫歐」嗰邊已經排除「硬脫歐」嘅可能，魚缸幾經風浪後，今個星期總算重上並企穩二萬九關口，係時間好好部署投資。
「兩會」曲終人散，但唔少政策都有一個方向。阿臣上星期話過「兩會」政策「有辣有唔辣」，講咗部分受惠嘅魚毛，今集講下缸友可能要留意嘅板塊啊！
＊神州房地產稅再吹，留意住建部更多風聲＊
今年「兩會」又再提出內房稅，不過其實相關嘅政策前幾年已經提過，上年「兩會」就講到五年內要立法規劃，不過去到今日都暫時未有進度，其中中金就話房地產稅上年９月被列入人大常委會立法規劃第一類項目表明立法工作，但時至今日「一審」仍未開啟，好大程度上睇得出立法層面仍然有唔少問題需要完善，但缸友都要留意未來幾個月住建部會唔會有咩風聲流出。
睇埋幾隻內房股表現，前日（１８日）隻碧桂園（０２００７）公布業績，去年多賺近三成三之後，噚日（１９日）已經畀幾間大行上調「他屐」，股價已經返過去１２蚊關口，係上年１０月以嚟首次。之前阿臣都諗幾隻內房股喺神州經濟下行之下會無咩運行，不過似乎又畀到驚喜大家喎，加上人仔最近持續強勢，都救返唔少神州磚頭佬股價。今日（２０日）另一藍戰士中海外（００６８８）就會放榜，而相比其他內房佬佢比較低負債，股價上亦比其他內房股落後，所以如果今日份業績理想，缸友不妨小注博一鋪。
＊憂慮不良貸款增，內銀股續「跑輸大市」＊
今年「兩會」提到為咗推進企業資金流動性，總理要求今年神州嘅大型銀行，小微貸要增長３０巴仙以上，同時加大對中小銀行降準力度，釋放資金要全部用於民營同小微企業貸款。不過阿臣就認為，相關政策雖能夠改善企業融資能力，但對各內銀佬嘅不良貸款會再有壞影響。阿臣原本諗住內銀股可以繼其他大隻戰士之後，帶領魚缸上漲，不過以隻走勢比較好嘅招行（０３９６８）為例，都開始進入橫行格局，其他幾隻內銀股似乎仍然會「跑輸大市」。
＊ＱＱ左右大局，魚缸有再造黃金交叉之勢＊
上個星期阿臣話魚缸十天線（約２８９３５）有下墜嘅跡象，而且會向下穿埋廿天線（約２８８８５），形成死亡交叉，不過最後無出現到，神州同香江魚缸似乎都唔想落，嚟緊魚缸走勢點，明顯就要睇聽日（２１）ＱＱ（００７００）業績如何。
綜合現時各大行對ＱＱ去年非通用會計準則（Ｎｏｎ－ＧＡＡＰ）純利嘅預計，八間大行嘅中位數係６４﹒７５億，而平均按年升幅係１７﹒４巴仙，對比２０１７年全年增長４３巴仙為低，而ＱＱ上季嘅非通用會計準則純利按年就升１５﹒４巴仙。
ＱＱ業績左右大局，如果未如理想，魚缸或者需要下試今個月低位（２８２０１）。不過，如果ＱＱ表現好過預期，以現時魚缸走勢而言，５０天線（約２７９９３）有望升破２５０天線（約２８１５１）之勢，可以形成黃金交叉，再上試近三萬點關口唔係難事。
表列截至３月２０日（１１：００ａｍ止）投資組合表現：
股份 股數 平均買入價 現價 總值
－－－－－－－－－－－－－－－－－－－－－－－－－－－－－－－－－－－－－－－－
港股：
華潤電力 ４０００股 １５﹒２８元 １４﹒１８元 ５６７２０元
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ５６７２０元
剩餘現金 ： ９５９４０元
組合淨值 ：１５２６６０元
組合本月收益表現： － １﹒５５％（截至上月底止組合淨值：１５５０７０元）
組合累計收益表現： ＋４５﹒３９％（本金１０５０００元計）（２０１６年８月開倉）
＊數據截至今日１１：００ａｍ
樂本健【秋日開倉26 - 27/9】保健品低至$20！► 火速行動
