最近筆者一位朋友百無聊賴,雖然佢完全唔鍾意「煲劇」,但亦趕一趕潮流註冊NETFLIX,筆者亦受邀夾錢,一個帳號可以同時支援幾個登入,每個月只需要幾十蚊,入戲院買包爆谷唔小心加大已經無咗,區區幾十蚊已經有數之不盡嘅劇集比你慢慢睇,真係有十對眼睇到盲都睇唔完,近日更加有港劇加入NETFLIX,感覺上套戲可以上架已經係一種認同,呢種軟實力真係不容小覷。
筆者未有具體研究NETFLIX嘅財務資料,不過以互聯網平台作核心的業務當然是覆蓋愈多觀眾群愈好,邊際成本估計相差無幾,筆者朋友笑稱點解美國太空總署要派太空船出宇宙,就係要幫呢堆公司尋找外星人新客戶,否則當所有人都用IPHONE,上AMAZON買野既時候,未來邊到仲有爆炸性新購買力呢?情況就好似16世紀大航海時代拓張市場咁。
睇得劇多,其實都有好處,以前睇美劇其中一種好鍾意拎來做題材就係政治同石油利益,每次男主角比人陷害或者追殺,必定係某日佢食飽飯行過唔小心見到類似利益團體既秘密,情況如同港產警匪片必定有一個或以上的臥底,筆者年青時已經植入呢種概念,今周沙特阿美由於需要公開發債而要披露財務資料,一睇之下引證了電影人既先見之明,雖然所有人都知道石油企業盈利必定十分可觀,但正式披露出來該公司盈利超過蘋果同谷歌總和,效果亦非常震撼,引證了電影夢工場從業員既聯想力十分之天馬行空。
*本周策略*
英鎊:早前建議於1﹒3080買入英鎊兌美元已成交,目標1﹒3350,止蝕1﹒2900。
加元:本周建議候低於1﹒3250買入美元兌加元,目標1﹒3450,止蝕1﹒3100。
《招商永隆銀行司庫 蕭啟洪》
【你點睇】的士記分制將於周末生效,你認為該制度可否幫助的士提升服務質素?► 立即投票