成日都會聽到有人講Ａ股「入摩」，究竟「入摩」係咩意思呢！？並唔係玩Ａ股玩到入咗魔，而係指內地Ａ股納入ＭＳＣＩ指數，而ＭＳＣＩ中文前稱係摩根史丹利資本國際公司，亦都有人會叫佢做明晟ＭＳＣＩ，所以就變成Ａ股入「魔」！ＭＳＣＩ係一間編制多種指數嘅公司，編制好嘅指數可以畀國際級機構投資者評估各種市場，所以ＭＳＣＩ又為基金投資嘅指標。基本上入得ＭＳＣＩ嘅股份就會得到認受性，亦都可以吸引到廣泛嘅投資者，從而增強本身股份嘅估值，所以入咗榜都幾威威㗎！
＊ＭＳＣＩ增納Ａ股會唔會對港交所有提振作用？＊
ＭＳＣＩ早前就宣布將會喺今嗰月２６號收市後，將所有中國大盤Ａ股喺其指數中的納入因子，由１５巴仙提高至２０巴仙，同時將中國中盤Ａ股納入ＭＳＣＩ指數。即係話有更多Ａ股可以畀國際投資者注意到，而成為佢哋基金部署時投資嘅指標，亦意味住龐大資金將會流入Ａ股。點解話港交所（００３８８）可能會因而被帶動呢？因為「滬港通」同「深港通」係其中一個可以畀投資者去買Ａ股嘅方法。而曾經有好多人包括港交所行政總裁李小加都憧憬過「滬港通」同「深港通」可以為港交所帶嚟可觀嘅收入，因為如果大戶透過呢個渠道去買Ａ股，港交所從中收取嘅手續費就相當和味！不過，大戶就似乎唔落搭，因為自「滬港通」同「深港通」生效以嚟，日均總成交額都只喺維持約莫１００億銀左右，似係散戶用嚟買賣居多，收益並無預期中咁爆。
因此，今次ＭＳＣＩ第三階段增納Ａ股對港交所嘅股價嘅提振作用有限。反而港股日後表現或者亦可能會因ＭＳＣＩ增納Ａ股而受影響；因為主要指數中，中國大型Ａ股嘅權重增加咗，而Ｈ股嘅比重就被攤薄，令國際投資者或會套現持有嘅Ｈ股股份，轉去買Ａ股。
＊阿臣分別買入平安好醫生、瑞聲＊
今次有２１８隻股份被納ＭＳＣＩ中國指數，當中Ｈ股有：雅生活服務（０３３１９）、深高速（００５４８）、中聯重科（０１１５７）、信達生物（０１８０１）、中國聯塑（０２１２８）、翰森製藥（０３６９２）、中國東方教育（００６６７）、雅高控股（０３３１３）、平安好醫生（０１８３３）、正榮地產（０６１５８）同九倉（００００４）。
由於近排醫藥同生物科技股喺「孖屐」都好ｈｉｔ，而ＭＳＣＩ今次都有揀中呢兩個板塊嘅股份，相信亦較為睇好其潛在爆發力，所以阿臣都諗住喺當中買一隻嚟部署中長線；其中就揀平安好醫生，因見佢早前被炒高後，依家股價都回落咗唔少，ＲＳＩ喺４７位置顯示可買入，所以喺今個星期一（１１日）以５２﹒９銀買入５００股，暫時止蝕價為五十天線（５１﹒３３２銀）。
上星期阿臣亦有話等瑞聲（０２０１８）回落５０銀樓下就會買貨，所以喺今個星期一亦同樣買咗瑞聲５００股，買入價４８﹒５銀。至於倉裏面嘅其他股票，就暫時按兵不動。
表列截至１１月１３日（１１：３０ａｍ止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
金界 ２０００股 ９﹒６５ １３﹒９４ ２７８８０
煤氣 １０００股 １６﹒００ １５﹒０４ １５０４０
ＳＰＤＲ金ＥＴＦ １０股 １０９７﹒００ １０７６﹒００ １０７６０
瑞聲科技 ５００股 ４８﹒５０ ４９﹒００ ２４５００
平安好醫生 ５００股 ５２﹒９０ ５５﹒６０ ２７８００
－－－－－－－－－－－－－－－－－－－－－－－－－－－－－－－－－－－－－－－－
股票市值 ： １０５９８０元
剩餘現金 ： 約５９１７６元
組合淨值 ：約１６５１５６元
組合本月收益表現： ＋０﹒３％（截至上月底止組合淨值：１６４６７１元）
組合累計收益表現： ＋５７﹒３％（本金１０５０００元計）（２０１６年８月開倉）
＊數據截至今日１１：３０ａｍ
【你點睇】的士記分制將於周末生效，你認為該制度可否幫助的士提升服務質素？► 立即投票
