自今個月中恒指公布公布小米(01810)獲納入恒生指數後,佢走勢就一路高歌,目前離開佢歷史最高位22﹒2銀僅相差4蚊。就喺今日(26日),小米就迎來「染藍」後首份成績,今年首季佢就同「孖屐」交咗一份十分滿意嘅成績表,唔知今次會唔會一樣優秀?能否喺績後延續強勁走勢?阿臣今日喺到就先同各位做個業績前瞻。
*孖屐預計次季淨利26﹒95億人幣*
據彭博預計第二季度,小米營收將達到512﹒75億銀(人民幣.下同)按年下滑1﹒3%;非通用會計準則經調整淨利潤為26﹒95億銀按年跌25﹒9巴仙。瑞銀就預期小米第二季度業績穩固,受手機銷售及互聯網服務推動,有潛在上望空間。該行尤其睇好小米喺神州嘅銷量,認為其次季新推出嘅5G手機及產品高端化策略,可以提高手機單價,並增加小米手機喺神州嘅使用者,帶來更強勁的互聯網服務增長。因此,預期小米中期收入按年升3巴仙至981﹒53億銀。
不過,花旗對此就較為保守。該行雖預期小米今年上半年收入則按年升8﹒5巴仙至1038﹒18億銀。但重申料小米第二季手機交付按年跌11巴仙至2880萬部,不過神州及印度「孖屐」表現仍疲弱。另外,受線下人流減少影響,物聯網產品增長緩慢。
*疫情或阻礙海外市場發展*
喺小米首季成績表入面就有提到,受惠於持續擴張海外「孖屐」,其首季海外「孖屐」收入達248億銀,按年增長近四成八,仲首次佔總收入嘅一半。可以講小米首季成績如此出色,海外「孖屐」係不可缺少嘅大功臣。目前小米比較主要嘅海外「孖屐」就有印度、西歐同拉丁美洲,其中小米已經連續十二個季度出貨量佔居印度「孖屐」嘅第一,而今年第一季度佢喺歐洲「孖屐」嘅市佔率都發展到14巴仙,排名前四。
但同第一季唔同,新冠病毒今年年初最先喺神州爆發,然後再發展成全球大流行,儘管神州經濟喺第二季開始緩慢復甦,但歐美國家仍然實施防疫限制措施。直到現時,印度仍然是全球第二嚴重的地區。面對新冠疫情蔓延,對佢智能手機同埋物聯網產品都會銷售帶來負面影響,所以次季海外「孖屐」發展將會放慢。據調查機構IDC發表的報告指,印度次季智能手機出貨量按年大跌半成,小米雖然仍係出貨量榜首,但都急跌近半成至540萬台。
*5G手機競爭不容忽視*
今年首季小米同樣捉住了5G手機潮,喺今年2月發布小米10和小米10 Pro,並憑5G等高端機型嘅拉動,首季全球智能手機平均售價按年升7巴仙。另外,喺今年4月小米繼續推出小米10青春版5G手機,針對年輕消費群體,價格上也是較平的。雖然小米喺5G手機「孖屐」採用高端同平價雙線出擊,但「孖屐」嘅競爭仍然係好激烈的。據調查機構IDC數據,小米第二季度全球智能手機出貨量按年跌近一成二至2850萬部,排名第四,佔「孖屐」比重約一成。而排名第一嘅華為佔「孖屐」比重兩成,第二季出貨量5580萬部,按年微跌5巴仙。
若單以神州「孖屐」計,華為第二季市佔率達四成半,小米只有一成,而且佢喺神州二季度出貨量按年大跌兩成二至910萬台。除咗華為,因為疫情關係關閉門市嘅蘋果,都係到不斷加大線上渠道及不同嘅減價措施,都為小米帶來威脅。由此可見,無論喺全球,還是喺神州「孖屐」,競爭都慘烈。
*下半年挑戰更嚴峻*
總體來睇,小米次季業績主要還係偏穩固為主,喺智能手機收入方面,特別係海外「孖屐」難再有驚喜。估計小米嘅毛利率會受惠於5G手機產品嘅帶動會繼續有所提高,另外,因防疫限制措施遊戲、電商等業務收入亦會有較快增長。
但對於小米而言,下半年嘅挑戰可以話更加嚴峻。首先,佢最先要面對中印關係緊張為佢帶來較直接嘅衝擊,因兩國關係由6月中開始急速惡化,印度國內開始出現抵制中國貨,印度政府並禁止民眾使用59個中國手機app,還延遲審批神州入境產品,包括手機部件及電視機嘅審批。
另外,蘋果亦將會在10月正式發布四款5G手機,傳Phone 12將分成兩批上市,首批會喺10月底開售,最低門檻價格為699美元。大摩曾指蘋果將迎來神州4年來最大iPhone換機潮,因為神州「孖屐」上有近七成嘅iPhone已經用咗超兩年。
*農夫山泉開始招股,試抽五手*
人稱為神州版可口可樂嘅農夫山泉(09633)終於開始招股。阿臣翻查咗資料,農夫山泉今次集資最多約83億銀,但佢上年派息就足足有95億,超越香江IPO計劃集資上限,佢上市前派息咁豪爽,料之後嘅股息應該會唔錯。另外,農夫山泉目前嘅毛利率55﹒4巴仙,係飲料行業鮮有的,而全球飲料龍頭嘅可口可樂毛利率為60﹒8巴仙。喺招股書就話,神州飲料「孖屐」去年總規模達9914億,預計2024年可達1﹒3萬億。阿臣都睇好神州內需「孖屐」前景,喺到先試抽五手,共約21717港銀(包括手續費)。
阿臣其他持倉不變。
表列截至8月26日收市阿臣投資組合表現:
股份 股數 平均買入價(元) 現價(元) 總值(元)
---------------------------------------
港股:
SPDR金ETF 10股 1097﹒00 1404﹒00 14040
平安好醫生 200股 52﹒90 106﹒80 21360
阿里巴巴 200股 210﹒50 278﹒00 55600
三一國際 2000股 4﹒11 3﹒86 7720
港交所 100股 264﹒50 379﹒40 37940
---------------------------------------
股票市值 : 136660元
凍結資金 : 21717元
剩餘現金 : 78606元
組合淨值 : 236983元
組合本月收益表現: + 1﹒7%(截至上月底止組合淨值:233074元)
組合累計收益表現: +125﹒7%(本金105000元計)(2016年8月開倉)
*數據截至8月26日收市
【你點睇】本港主要銀行跟隨美聯儲減息,你對樓市前景有否信心?► 立即投票